Արարատ Միրզոյանի մահափորձի գործով մեղադրյալը դատապարտվել է 3,5 տարվա ազատազրկման
Civilnet
Արտաքին գործերի նախարար Արարատ Միրզոյանի նկատմամբ 2020-ին իրականացված մահափորձի գործով մեղադրյալ Արա Բադոյանը դատապարտվել է 3,5 տարվա ազատազրկման։
ՍիվիլՆեթի հետ զրույցում գլխավոր դատախազությունից հայտնեցի, որ դատական ակտը ստանալուց հետո դատախազության կողմից ներկայացվելու է վերաքննիչ բողոք։
Արա Բադոյանը մեղավոր է ճանաչվել նախկին Քրեական օրենսգրքի 225-րդ հոդվածի 2-րդ մասով (զանգվածային անկարգությունների ժամանակ դրանց մասնակցի կողմից բռնություն գործադրելը, ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը)։
2023 հունվարի 17-ին Ազգային անվտանգության ծառայությունը հայտնել էր, որ Բադոյանը 2020-ի պատերազմի դադարեցման պայմաններից դժգոհ մի խումբ քաղաքացիների հետ հավաքվել էր կառավարության, ազգային ժողովի վարչական շենքերի դիմաց, դրանց ներսում և ՀՀ վարչապետին հատկացված կեցավայրի մոտ, ուր կատարվում էին զանգվածային անկարգություններ: Նույն հաղորդագրության համաձայն` նա միացել է այդ ժամանակ ԱԺ նախագահ Արարատ Միրզոյանի նկատմամբ բռնություն գործադրող զանգվածային անկարգությունների մասնակիցներին, ճեղքելով վերջիններիս շարքերը՝ մոտեցել էր արդեն իսկ գետնին ընկած Արարատ Միրզոյանին և ոտքով հարվածել վերջինիս:
Պատմություններ
