«Ստամբուլյան բանակցությունները՝ 2022-ին ընդհատված խաղաղության գործընթացի շարունակություն». Մեդինսկի

Ռուսաստանը Ուկրաինայի հետ ուղիղ բանակցությունները դիտարկում է որպես 2022-ին ընդհատված խաղաղության գործընթացի շարունակություն. Ստամբուլում ռուսասկան պատվիրակության ղեկավար Վլադիմիր Մեդինսկին ճեպազրույց է ունեցել: 

Նրա խոսքով՝ նպատակն է «վաղ թե ուշ հաստատել երկարաժամկետ խաղաղություն՝ վերացնելով հակամարտության հիմքում ընկած պատճառները»։

Մեդինսկին նշել է նաև, որ պատվիրակությունն ունի բոլոր անհրաժեշտ իրավասություններն ու լիազորությունները Ուկրաինայի հետ բանակցությունների համար։

Ավելի վաղ խոսել էր Ուկրաինայի նախագահ Վլադիմիր Զելենսկին:

«Մենք [ռուսական պատվիրակության կազմում] եկածների մեջ չենք տեսնում որոշումներ կայացնողներին։ Չնայած դրան, Թրամփի և Էրդողանի նկատմամբ հարգանքից ելնելով, ցանկանալով փորձել համաձայնության գալ, ցանկանալով փորձել անել առաջին քայլերը լարվածության թուլացման ուղղությամբ, ես որոշեցի մեր պատվիրակությունն ուղարկել Ստամբուլ»,- նշել էր նա:

Մայիսի 15-ին Ստամբուլում հավաքվել են բանակցելու Ռուսաստանի և Ուկրաինայի պատվիրակությունները։ Անկարա է մեկնել Ուկրաինայի նախագահ Վլադիմիր Զելենսկին։