«Կոռուպցիայում ներգրավված ցանկացած ոք կպատժվի օրենքի ողջ խստությամբ». Արթուր Հովհաննիսյան

Եթե որևէ մեկը ներգրավված լինի որևէ կոռուպցիոն գործարքի մեջ, պատժվելու է օրենքի ողջ խստությամբ, եթե հատկապես լինի «Քաղաքացիական պայմանագիր» կուսակցության թիմից:  Այս մասին հայտարարել է «Քաղաքացիական պայմանագիր» խմբակցության քարտուղար Արթուր Հովհաննիսյանը՝ ԱԺ ճեպազրույցների ժամանակ պատասխանելով Վաղարշապետի համայնքապետ Դիանա Գասպարյանի հրաժարականի և կոռուպցիայի մեջ հնարավոր ներգրավվածության վերաբերյալ հարցին։

«Անկախ մարդու անուն–ազգանունից, քաղաքական պատկանելիությունից, եթե որևէ մեկը ներգրավված կլինի որևէ կոռուպցիոն գործարքի մեջ, հովանավորչության գործարքի մեջ, պատժվելու է օրենքի ողջ խստությամբ, եթե հատկապես լինի «Քաղաքացիական պայմանագիր» կուսակցության թիմից»,- ասել է Հովհաննիսյանը։

Նախօրեին Վաղարշապատի համայնքապետ Դիանա Գասպարյանն իր ֆեյսբուքյան էջում հայտնել էր, որ առաջիկայում կլքի պաշտոնը և վայր կդնի ավագանու անդամի մանդատը:  

Դիանա Գասպարյանի ընտանիքի շուրջ կոռուպցիոն տարբեր հրապարակումներ են եղել մամուլում։ Ըստ հրապարակումների` Էջմիածնի քաղաքապետը համայնքապետարանի համար վառելիքի պատվեր է տվել իր ամուսնու գազալցակայանին։ Մեկ այլ հրապարակման համաձայն էլ՝ Գասպարյանի սկեսուրն Էջմիածնում ապօրինի շինարարություն է սկսել։