Civilnet
Այսօր տարածաշրջանում իրական խաղաղություն և կայունություն է: Քայլեր են ձեռնարկվում Ադրբեջանի և Հայաստանի միջև հարաբերությունների կարգավորման ուղղությամբ։ Այս մասին իրանական Tasnim News գործակալությանը տված հարցազրույցում հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության վարչության պետ Հիքմեթ Հաջիևը։
«Տարածաշրջանում ստեղծվել են խաղաղության համար շատ բարենպաստ պայմաններ: Հարավային Կովկասում ի հայտ է եկել նոր ստատուս քվո և նոր իրականություն: Պաշտոնական Բաքուն հայկական կողմին է ներկայացրել Հայաստանի հետ հարաբերությունների կարգավորման վերաբերյալ խաղաղության պայմանագրի տեքստը: Սա հստակ ապացույց է այն բանի, թե որքանով է Ադրբեջանը հավատարիմ տարածաշրջանային խաղաղության օրակարգին, որքանով է այն աջակցում դրան: Դրական կողմն այն է, որ խաղաղության պայմանագրի տեքստը համաձայնեցված է»,- ասել է Հաջիևը:
Հաջիևը նաև ասել է, որ դեռևս կան բաց հարցեր, որոնք չեն համաձայնեցվել Հայաստանի հետ: Ըստ Հաջիևի, տարածաշրջանում երկարատև և վերջնական խաղաղության հասնելու համար անհրաժեշտ է «փոխել Հայաստանի սահմանադրությունը», որտեղ, ըստ Բաքվի, «տարածքային պահանջներ կան Ադրբեջանի նկատմամբ»։
«Բայց մենք կարող ենք գոհունակությամբ ասել, որ Ադրբեջանի և Հայաստանի անկախությունից ի վեր տարածաշրջանում ստեղծվել են խաղաղության համար բարենպաստ պայմաններ: Այսօր տարածաշրջանում իրական խաղաղություն և կայունություն է: Փաստացի կարող ենք ասել, որ տարածաշրջանում խաղաղություն է։ Ադրբեջանը շարունակելու է ջանքեր գործադրել, որպեսզի սա իրավականորեն ֆորմալացվի, որպեսզի տարածաշրջանում վերջնական խաղաղություն հաստատվի», - ասել է Հաջիևը։
Պատմություններ
