Civilnet
Հայ-թուրքական սահմանի «Մարգարա» անցակետն ամբողջովին պատրաստ է շահագործման, սակայն սահմանը բացելու հարցը քաղաքական բնույթի է, ես նորություն չունեմ այդ մասով։ Այս մասին լրագրողների հետ հանդիպմանն ասել է պետական եկամուտների կոմիտեի նախագահ Էդուարդ Հակոբյանը։
«Մենք պատրաստ ենք, մեր ենթակառուցվածքը, մաքսային ծառայությունը, համապատասխան տեխնիկան, որն անհրաժեշտ է, որ սպասարկի այդ սահմանի հոսքերը՝ պատրաստ են»,- ասաց ՊԵԿ նախագահը։
2022-ի հուլիսի 1-ին Հայաստանի և Թուրքիայի հատուկ ներկայացուցիչներ Ռուբեն Ռուբինյանը և Սերդար Քըլըչը Վիեննայում հանդիպման ընթացքում պայմանավորվել էին հնարավոր ամենասեղմ ժամկետներում Հայաստան-Թուրքիա ցամաքային սահմանը հատելու հնարավորություն ապահովել, համապատասխանաբար, Հայաստան և Թուրքիա այցելող երրորդ երկրների քաղաքացիների համար։
Թուրքիայի հատուկ ներկայացուցիչ Սերդար Քըլըչն ապրիլին ՍիվիլՆեթի հետ զրույցում ասել էր, որ հայ-թուրքական սահմանի «Մարգարա» անցակետը բացելու ուղղությամբ աշխատանքներ են տարվում տեխնիկական մանրամասների վրա։ «Չգիտեմ՝ երբ դա կլինի, բայց լուրջ աշխատում ենք։ Հուսով եմ՝ հնարավորինս շուտ պետք է ավարտենք այս գործընթացը»,- ասել էր Քըլըչը։
Պատմություններ
