Գերիների վերադարձի հարցը շարունակում է մնալ առաջնահերթություն․ Կոստանյան

Բաքվում պահվող հայ ռազմագերիների և քաղաքացիական պահվող անձանց ազատ արձակման հարցը մշտապես տեղ է գտնում մեր բոլոր հանդիպումներում։ Այս մասին հայտարարել է Հայաստանի փոխարտգործնախարար Վահան Կոստանյանը։ «Հարավային Կովկասը՝ ռազմավարական հանգույց. մարտահրավերներ և հնարավորություններ» միջոցառման ընթացքում լրագրողների հետ զրույցում Կոստանյանը նշել է, որ միջոցառմանը նաև մարդու իրավունքների ոլորտում հայտնի գործընկերներ կան, որոնց ներկայացվելու է գերիների հարցը:

«Բնականաբար, մեր միջոցառմանը նաև մարդու իրավունքների ոլորտում բավականին հայտնի գործընկերներ կան, որոնք Երևան են ժամանել: Վստահաբար, խոսելով մարդու իրավունքների ոլորտի մասին՝ մենք չենք կարող և ցանկություն էլ չունենք չանդրադառնալու այդ թեմային, հակառակը դա մեր առաջնահերթությունների թվում է:

Մինչև այն պահը, երբ մեր բոլոր համերկրացիները չեն վերադարձել Հայաստան, բնականաբար, արդյունքներով բավարարված լինել չենք կարող»,- ասել է Կոստանյանը: