Ժամանակն է, որ Թուրքիայի հետ երկխոսությունը շոշափելի արդյունքներ ունենա․ Միրզոյան

Հայաստանը, չնայած Թուրքիայի հետ դիվանագիտական հարաբերություններ չունենալուն, այսօր ունի շատ ավելի ակտիվ և գործուն երկխոսություն, քան որոշ երկրներ, որոնք պաշտոնապես դիվանագիտական հարաբերություններ ունեն միմյանց հետ։ Այս մասին հայտարարել է արտաքին գործերի նախարար Արարատ Միրզոյանը, ԱԺ արտաքին հարաբերությունների ու ֆինանսավարկային և բյուջետային հարցերի մշտական հանձնաժողովների համատեղ նիստում «ՀՀ 2024-ի պետական բյուջեի կատարման մասին» տարեկան հաշվետվության նախնական քննարկումների ժամանակ։

«Անշուշտ, իրավացի կլինի որևէ մեկը, որ ասի՝ ժամանակն է արդեն, որ այդ երկխոսությունը շոշափելի արդյունքներ ունենա գետնի վրա», - նշել է նախարարը։

Միրզոյանի խոսքով՝ այդ երկխոսությունը երկար ժամանակ զարգացել է դրական հունով։ Նա հավելել է, որ կան միջանկյալ արդյունքներ, սակայն այժմ ժամանակն է տեսնելու վերջնական արդյունքները։

«Սա է մեր համոզմունքը», - ասել է Միրզոյանը։

Այսօր՝ հունիսի 5-ին, հեռախոսազրույց են ունեցել Հայաստանի վարչապետ Նիկոլ Փաշինյանն ու Թուրքիայի նախագահ Ռեջեփ Թայիփ Էրդողանը։ Երկու երկրների ղեկավարները քննարկել են Հայաստան–Թուրքիա հարաբերություններին և տարածաշրջանային զարգացումներին վարեբերող հարցեր և պայմանավորվել շարունակել երկխոսությունը։

Մայիսի 16-ին Փաշինյանն Ալբանիայում կարճատև զրույց էր ունեցել Էրդողանի հետ։

Հայ-թուրքական հարաբերությունների կարգավորման գործընթացը մեկնարկել է 2022-ի սկզբին։