Գերիների վերադարձի շուրջ կառուցողական խոսակցություն չի ստացվում Բաքվի հետ․ Միրզոյան

Բաքվում ապօրինի պահվող Արցախի ռազմաքաղաքական ղեկավարության ազատ արձակման թեման Ադրբեջանի հետ բանակցությունների ցավոտ մասն է, եզակի հարցերից մեկը, որի շուրջ կառուցողական խոսակցություն չի ստացվում ունենալ։ Այս մասին ասել է ԱԳ նախարար Արարատ Միրզոյանը խորհրդարանում լրագրողների հետ ճեպազրույցի ժամանակ։

«Այս փուլում ուրախ լուրեր հայտնելու տեղ չունենք»,-ասել է Միրզոյանը։

Նախարարը հավելել է, որ եթե հաջողվի ձեռք բերել իսկական և վերջնական խաղաղության պայմանագիր, առաջ շարժվել սահմանների դելիմիտացիայի գործընթացում և հասնել իրական կարգավորման, ապա ստեղծված բարենպաստ միջավայրում հնարավոր կլինի լուծումներ գտնել նաև գերիների վերադարձի համար։

«Կարծում են, որ գոնե այդ պահին ավելի բարենպաստ միջավայր կլինի այդ հարցերը լուծելու», - նշել է Միրզոյանը։

2023-ի սեպտեմբերի 19-20-ին Արցախի դեմ մեկօրյա պատերազմից և երկրամասի ամբողջ հայ բնակչության էթնիկ զտումից հետո Ադրբեջանը պատանդ է վերցրել Արցախի նախկին ռազմաքաղաքական ղեկավարությանը, որոնց թվում են երեք նախկին նախագահներ Արկադի Ղուկասյանը, Բակո Սահակյանը և Արայիկ Հարությունյանը, ԱԺ նախագահ Դավիթ Իշխանյանը, նախկին պետնախարար Ռուբեն Վարդանյանը, Արցախի Պաշտպանության բանակի նախկին հրամանատար Լևոն Մնացականյանը, ՊԲ հրամանատարի տեղակալ Դավիթ Մանուկյանը և նախկին արտգործնախարար Դավիթ Բաբայանը։ Բաքուն պաշտոնապես ընդունում է իր մոտ 23 հայ պատանդների առկայությունը, որոնց մեծ մասը գերեվարվել է 2020-ի պատերազմից հետո։