ՄԱԿ ԱԽ-ում անհամաձայնություններ՝ Իրանի և Իսրայելի միջև հրադադարի բանաձևի շուրջ
Civilnet
Միավորված ազգերի կազմակերպության Անվտանգության խորհուրդը (ՄԱԿ ԱԽ) հրատապ նիստ է գումարել՝ ԱՄՆ-ի գլխավորությամբ իրականացված հարվածներից հետո Իրանի միջուկային օբյեկտների դեմ։
Ռուսաստանը, Չինաստանը և Պակիստանը ներկայացրել են բանաձևի նախագիծ՝ պահանջելով «անհապաղ հրադադար»։ Թեև նախագիծը չի հիշատակում ԱՄՆ-ին կամ Իսրայելին, այն դատապարտում է հարվածներն Իրանի միջուկային օբյեկտների վրա։ Բանաձևի քվեարկության ամսաթիվը դեռևս որոշված չէ, հայտնում է AlJazeera-ն։
Բանաձևի ընդունման համար անհրաժեշտ է առնվազն ինը կողմ ձայն և ոչ մի վետո ՄԱԿ ԱԽ հինգ մշտական անդամներից՝ Չինաստանից, Ֆրանսիայից, Ռուսաստանից, Մեծ Բրիտանիայից և ԱՄՆ-ից։ Սա գրեթե անհնար է դարձնում բանաձևի ընդունումը, քանի որ ԱՄՆ-ը չի դատապարտի սեփական քայլերը։
ՄԱԿ-ի գլխավոր քարտուղար Անտոնիու Գուտերեշը ԱԽ-ում հայտարարել է, որ տարածաշրջանը կանգնած է «մահաբեր անկման եզրին»։
«ԱՄՆ-ի կողմից Իրանի միջուկային օբյեկտների ռմբակոծումը վտանգավոր շրջադարձ է մի տարածաշրջանում, որն արդեն իսկ լուրջ ցնցումների մեջ է։ Մենք կանգնած ենք վրեժխնդրության շղթայական ռիսկի առջև։ Պետք է անհապաղ ու վճռական քայլեր ձեռնարկենք՝ բախումները դադարեցնելու և Իրանի միջուկային ծրագրի շուրջ լուրջ ու շարունակական բանակցություններին վերադառնալու համար»,- ասել է Գուտերեշը։
ՄԱԿ-ում ԱՄՆ-ի ժամանակավոր դեսպան Դորոթի Շեան իր ելույթում պաշտպանել է ռազմական գործողությունը՝ հայտարարելով, թե Վաշինգտոնը նպատակ է ունեցել ոչնչացնել Իրանի հարստացման կարողությունը՝ պաշտպանելու ԱՄՆ քաղաքացիներին և դաշնակիցներին։
Իրանի դեսպան Ալի Բահրեյնին արձագանքել է, որ ԱՄՆ-ի և Իսրայելի հարձակումները «չեն եղել վակուումում» և եղել են ԱՄՆ-ի ու եվրոպական դաշնակիցների «քաղաքականապես պայմանավորված գործողությունների» հետևանք։
Նա հայտարարել է, որ «ԱՄՆ-ն ընտրեց ոչնչացնել դիվանագիտությունը» և ընդգծել, որ Իրանի բանակը կորոշի՝ «երբ, ինչպես և ինչ ծավալով» պատասխանել։
Իսկ Իսրայելի ՄԱԿ-ի դեսպան Դանի Դանոնը հայտարարել է, որ հարվածները «աշխարհը դարձրել են ավելի անվտանգ», և մերժեց դատապարտման կոչերը։ Հարցին՝ արդյոք Իսրայելն աջակցում է ռեժիմի փոփոխությանը Թեհրանում, նա պատասխանել է. «Դա Իրանի ժողովրդի որոշելիքն է, ոչ թե մերը»։
Պատմություններ
