Իրանը ցանկանում է դադարեցնել համագործակցությունը ԱԷՄԳ-ի հետ

Իրանը ցանկանում է դադարեցնել համագործակցությունը Ատոմային էներգիայի միջազգային գործակալության (ԱԷՄԳ) հետ, եթե չստանա երաշխիքներ գործակալության պրոֆեսիոնալ և անկողմնակալ գործունեության վերաբերյալ։ Այս մասին հայտարարել է Իրանի խորհրդարանի նախագահ Մոհամադ Բաքեր Ղալիբաֆը խորհրդարանի նիստի ժամանակ։

Նա կրկնել է, որ Իրանի միջուկային ծրագիրը խաղաղ բնույթ ունի և հիշեցրել Իսլամական հեղափոխության առաջնորդի կողմից միջուկային զենքի կիրառման արգելքի մասին կրոնական որոշումը։ Ղալիբաֆը նաև քննադատել է ԱԷՄԳ-ին՝ նշելով, որ այն չի կատարել իր պարտավորությունները և դարձել է քաղաքական գործիք։

Խորհրդարանի ղեկավարը դատապարտել է ԱՄՆ-ի ռազմական հարվածները Իրանի միջուկային օբյեկտներին՝ դրանք որակելով ԱՄՆ-ի անմիջական ներգրավվածություն որպես պատասխան Իսրայելի ձախողումներին։ Նա սպառնացել է պատասխան տալ, որը «կստիպի ԱՄՆ նախագահ Դոնալդ Թրամփին զղջալ իր ագրեսիայի համար»։

Իսրայելը հունիսի 13-ից հարվածներ է հասցրել Իրանի ռազմական և միջուկային ենթակառուցվածքներին, իսկ ԱՄՆ-ն կիրակի գիշերը հարձակվել է երեք միջուկային օբյեկտների վրա՝ Նաթանզում, Ֆորդոյում և Իսֆահանում։ Իրանը պատասխան հարվածներ է հասցնում Իսրայելին:

Իրանական պաշտոնյաները նշել են, որ Թեհրանը պահպանում է իր իրավունքները պատասխանելու ԱՄՆ-ի հարձակումներին։