Ռուսաստանը կարգելի ադրբեջանական գինիների և կոնյակների ներմուծումը

Մոսկվայի և Բաքվի միջև երկկողմ հարաբերությունների սրման ֆոնին Ռուսաստանի իշխանությունները դիտարկում են արգելել Ադրբեջանից ալկոհոլային արտադրանքի ներկրումը։ Այդ մասին հայտնում են ռուսական ԶԼՄ-ները։ Արգելքի տակ կարող են հայտնվել Ադրբեջանից ներկրվող բոլոր անվանումների գինիներն ու կոնյակները՝ առանց բացառության։

Հունիսի 27-ին Եկատերինբուրգում ռուս իրավապահների կողմից ադրբեջանցիների տներում իրականացված հատուկ գործողության ժամանակ սպանվել է երկու ադրբեջանցի, մի քանիսը՝ վիրավորվել։ Նույն օրը Եկատերինբուրգի դատարանը մի քանի ադրբեջանցիների կալանավորել էր։

Հունիսի 30-ի առավոտյան Բաքվում՝ «Sputnik Ադրբեջան» խմբագրությունում իրականացվել է խուզարկություն, որի արդյունքում ձերբակալվել են լրատվամիջոցի գլխավոր խմբագիր Իգոր Կարտավիխը և խմբագրության ղեկավար Եվգենի Բելոուսովը։ Բաքուն նրանց կասկածում է Ռուսաստանի Դաշնության անվտանգության դաշնային ծառայության (ՖՍԲ) համար աշխատելու մեջ։

Նույն օրը երեկոյան հայտնի դարձավ նաև Ruptly գործակալության լրագրող, Ադրբեջանի և Ռուսաստանի քաղաքացի Այթեքին Հուսեյնովայի ձերբակալության մասին։ Ռուսական ԶԼՄ-ների հաղորդմամբ՝ խմբագրության համաձայնությամբ նա մեկնել էր Sputnik-ի իր գործընկերների ձերբակալման վայր և նկարահանել էր տեղի ունեցածը բջջային հեռախոսով։