Civilnet
Արմավիրի մարզում տեղի ունեցած սպանությունից հետո գազալցակայանի երկու աշխատակից մեղադրվում են հանցագործության հետքերը թաքցնելու համար, հաղորդում է Հայաստանի Քննչական կոմիտեն։
Հետաքննության տվյալներով՝ գազալցակայանի հերթափոխի պետը սպանության բացահայտմանը խոչընդոտելու նպատակով գազալցման աշխատակցին հրահանգել է մաքրել արյան հետքերը և հավաքել կրակված պարկուճները՝ նետելով դրանք զուգարանակոնքը։
«Մարզում գործող գազալցակայանի հերթափոխի պետը սպանություն կատարած անձի բացահայտմանը խոչընդոտելու նպատակով՝ գազալիցքավորողին հրահանգել է ջրով լվանալ գազալցակայանի տարածքում թափված արյան հետքերը, հավաքել և զուգարանակոնքը նետել կրակոցների արդյունքում տարածքում թափված կրակված պարկուճները, այնուհետև կրկին լվանալ արյան հետքերը՝ այդ կերպ կազմակերպելով և ղեկավարելով գազալիցքավորողի կողմից Կ.Բ.-ի կատարած հանցագործությունների պարտակումը»,- նշված է հաղորդագրության մեջ։
Երկու անձանց նկատմամբ հարուցվել է հանրային քրեական հետապնդում։ Նրանց գործը մեղադրական եզրակացությամբ ուղարկվել է դատախազություն։
Մամուլում առկա տեղեկություններով՝ խոսքը Վաղարշապատի նախկին քաղաքապետ Դիանա Գասպարյանի ամուսնու գազալցակայանում տեղի ունեցած սպանության մասին է։
***
Մարտի 22-ին հայտնի դարձավ, որ Արմավիրի մարզում գազալցակայանում տեղի է ունեցել սպանություն։ Ըստ ԶԼՄ-ների՝ գազալցակայանը պատկանում է Վաղարշապատի նախկին համայնքապետ Դիանա Գասպարյանի ամուսնուն։ Կրակոցների հետևանքով մահացել է 36-ամյա տղամարդ։
Քննչական կոմիտեն հայտնել է, որ քրեական վարույթի շրջանակում գազալցակայանի հերթափոխի պետը և գազալիցքավորողը մեղադրվում են հանցանք կատարած անձին աջակցելու համար։ Ըստ հաղորդագրության՝ հերթափոխի պետը հրահանգել է մաքրել արյան հետքերը և հավաքել կրակված պարկուճները՝ հանցանքը պարտակելու նպատակով։
ԶԼՄ-ները հայտնում են, որ սպանության գործով իրավապահները փնտրում են Արմավիրի մարզում «ՃԱՊ» մականունով հայտնի 33-ամյա Կարեն Բադալյանին։ Ըստ նույն աղբյուրների՝ մարտի 25-ին իրավապահները խուզարկություն են իրականացրել Դիանա Գասպարյանի տանը։
Մայիսի 15-ին Գասպարյանը հայտարարել է, որ պատրաստվում է հրաժարականի դիմում ներկայացնել։ Հաջորդ օրը ԶԼՄ-ներում տեղեկություններ են հայտնվել, որ նրա ամուսինը կարող է ձերբակալվել՝ աղմկահարույց պատմության հետ առնչություն ունենալու պատճառով։
Պատմություններ
