Մայր Աթոռը դատապարտում է Փաշինյանի՝ Էջմիածնում հավաք անցկացնելու հայտարարությունը

Մայր Աթոռ Սուրբ Էջմիածինը դատապարտում է վարչապետ Նիկոլ Փաշինյանի՝ Էջմիածնում հավաք անցկացնելու հայտարարությունը։

Վարչապետ Նիկոլ Փաշինյանը կիրակի հայտարարել է իր հետևորդների Վաղարշապատի կենտրոնական հրապարակում հավաք կազմակերպելու մասին։

«Մայր Աթոռ Սուրբ Էջմիածինը դատապարտում է հարձակում ու բռնություն հրահրելու այս փորձը, որը բացահայտ միջամտություն է Հայոց Եկեղեցու կյանքին և նրա ինքնակառավարմանը։

Հորդորում ենք իշխող քաղաքական ուժին դադարեցնել հակաեկեղեցական, անօրինական արշավը և լծվել երկրի առջև ծառացած լրջագույն հիմնախնդիրների հաղթահարմանը։ Միաժամանակ դիմում ենք պետության իրավասու մարմիններին և պաշտոնյաներին ձեռնարկել բոլոր անհրաժեշտ և օրինական միջոցները՝ կանխարգելելու հակաօրինական այս միջոցառումը։

Մայր Աթոռ Սուրբ Էջմիածինը բարձրորեն գնահատում է բարեպաշտ մեր ժողովրդի սերն ու հավատարմությունը հանդեպ Մայր Եկեղեցին և նախանձախնդրությունը՝ պաշտպանելու համայն հայության հոգևոր կենտրոնն ու մեր նվիրական սրբությունները։ Կոչ ենք անում մեր ժողովրդի զավակներին չտրվել իշխանությունների սադրանքներին, պահպանել զգոնությունն ու ողջախոհությունը և  հավատով ու աղոթական ոգով համախմբվել առկա փորձությունների դիմագրավման համար»,- նշված է Մայր Աթոռի հայտարարությունում։

«Պատրաստվեք Մեծ հոգևոր հանդիպման Էջմիածնի կենտրոնական հրապարակում»,- կիրակի գրել էր Նիկոլ Փաշինյանը Ֆեյսբուքի իր էջում։