Ստամբուլում ընթանում են Իրանի և Եվրոպական «եռյակի» միջուկային բանակցությունները
Civilnet
Ստամբուլում մեկնարկել են Իրանի և եվրոպական եռյակի (Մեծ Բրիտանիա, Ֆրանսիա և Գերմանիա) միջև միջուկային բանակցությունները։ Այս մասին հայտնում է իրանական Mehr-ը։
Աղբյուրի փոխանցմամբ՝ բանակցություններն ընթանում են Ստամբուլում Իրանի հյուպատոսության շենքում՝ փոխարտգործնախարարների մակարդակով։
Իրանական կողմից բանակցություններին մասնակցում են իրավական և միջազգային հարցերով փոխարտգործնախարար Քազեմ Ղարիբաբադին և քաղաքական հարցերով փոխարտգործնախարար Մաջիդ Թախտ-Ռավանչին։
Երեկ Իրանի արտաքին գործերի նախարար Սեյեդ Աբբաս Արաղչին Ստամբուլում կայացած բանակցությունների վերաբերյալ ասել է. «Վաղվա բանակցությունները նախորդ քննարկումների շարունակությունն են, և աշխարհը պետք է իմանա, որ մեր դիրքորոշումները չեն փոխվել՝ մենք կպաշտպանենք Իրանի ժողովրդի իրավունքները»։
Արաղչին ասել է, որ հատկապես Իսրայելի կողմից վերջերս պարտադրված պատերազմից հետո անհրաժեշտ է, որ մյուս կողմը տեղեկացվի, որ Իրանի Իսլամական Հանրապետության դիրքորոշումը մնում է ամուր և անսասան։ «Մեր ուրանի հարստացումը կշարունակվի. մենք չենք հրաժարվում Իրանի ժողովրդի այս իրավունքից», - հայտարարել է նա։
Ավելի վաղ Իրանի արտաքին գործերի նախարարության խոսնակը հայտարարել էր, որ բանակցությունների օրակարգը հստակ է՝ պատժամիջոցների վերացում և Իրանի միջուկային ծրագրին վերաբերող հարցեր՝ այն տարբերությամբ, որ այս անգամ Իրանը հստակ կարտահայտի իր դիրքորոշումները։
Պատմություններ
