Մեծ Բրիտանիան կճանաչի Պաղեստինը, եթե Իսրայելը չդադարեցնի Գազայի պատերազմը․ վարչապետ

Մեծ Բրիտանիայի վարչապետ Քիր Սթարմերն իր կառավարության արտահերթ նիստում հայտարարել է, որ Միացյալ Թագավորությունը մինչև սեպտեմբեր կճանաչի Պաղեստինի պետությունը, եթե Իսրայելը չձեռնարկի «էական քայլեր» Գազայի պատերազմը դադարեցնելու և կայուն խաղաղության գործընթացին պարտավորվելու ուղղությամբ: Այդ մասին հայտնում է Al Jazeera-ն:

Կառավարության կողմից հրապարակված հայտարարության համաձայն՝ Սթարմերը նշել է, որ ճանաչումը կարող է տեղի ունենալ ՄԱԿ-ի Գլխավոր ասամբլեայի նստաշրջանից առաջ Նյու Յորքում, եթե Իսրայելը համաձայնություն չտա հրադադարի, չդադարեցնի օկուպացված Արևմտյան ափի որոշ հատվածների միացման ծրագիրը և չաջակցի երկու պետությունների լուծման քաղաքական ուղուն։

«Վարչապետը վերահաստատել է, որ Համասի և Իսրայելի միջև հավասարություն չկա և որ մեր պահանջները Համասից մնում են անփոփոխ՝ նրանք պետք է ազատ արձակեն բոլոր պատանդներին, համաձայնեն հրադադարին, ընդունեն, որ որևէ դերում չեն լինելու Գազայի կառավարման մեջ և զինաթափվեն»,- նշված է հայտարարությունում:

Սթարմերն ընդհատել է նախարարների ամառային արձակուրդները՝ քննարկելու եվրոպական նախաձեռնությամբ խաղաղության նախագիծ և մարդասիրական օգնության ավելացման ծրագրեր Գազայի հատվածում, որտեղ ՄԱԿ-ը նախազգուշացրել է սովի սպառնալիքի մասին:

Իսրայելը քննադատել է Մեծ Բրիտանիայի այս որոշումը՝ այն որակելով որպես «հատուցում Համասին», ինչը կարող է վնաս հասցնել դիվանագիտական ջանքերին՝ ուղղված Գազայի պատերազմին վերջ դնելուն։

Ավելի վաղ Ֆրանսիան ևս հայտարարել էր, որ սեպտեմբերին պաշտոնապես կճանաչի Պաղեստինի պետությունը։