Civilnet
Ադրբեջանում պահվող հայ գերիների հարցը բարձրացվել է բարձրագույն մակարդակում, սակայն այս պահին որևէ արդյունք չկա: Այս մասին Վաշինգտոնում առցանց ասուլիսի ժամանակ հայտարարեց վարչապետ Նիկոլ Փաշինյանը:
«Ադրբեջանում պահվող գերիների թեման քննարկվել և բացատրվել է բարձրագույն մակարդակում, հիմա ես այլ մանրամասների մեջ չեմ մտնում»,- ասաց նա։
Փաշինյանը նշեց, որ հաշվի առնելով նախորդ փորձը՝ դեռ վաղ է գնահատականներ տալ քննարկումների արդյունքների վերաբերյալ:
«Այդ քննարկումների արդյունքների մասին էլ ձեռնպահ կմնամ որևէ բան ասել, որովհետև քանի դեռ արդյունք չկա: Ցավոք դեռ արդյունք չկա», - նշեց նա։
Անդրադառնալով գերության մեջ գտնվող Արցախի ռազմաքաղաքական ղեկավարության վերադարձի հարցին Փաշինյանն ընդգծեց, որ իրենք չեն առանձնացնում գերիներին, այլ հումանիտար հարցերը դիտարկում են ամբողջության մեջ:
Միևնույն ժամանակ Փաշինյանն ընդգծեց, որ հումանիտար հարցերը չեն կարող լուծվել մեկուսացված ձևով և դրանց լուծումը կապված է ընդհանուր գործընթացների առաջընթացի հետ:
«Մենք պետք է հասկանանք, որ այդ հարցերը, հումանիտար հարցերը առանձին վերցրած իրենք լուծում չունեն, որովհետև այս ամեն ինչը, այս առաջընթացը, այս պատմական առաջընթացը, որը մենք արձանագրում ենք, հենց դա է բերելու խնդիրների լուծմանը», - նշեց նա։
Վարչապետի խոսքով՝ հումանիտար խնդիրները բարդություններ ունեն, և հենց այդ բարդություններն են պատճառը, որ դրանք դեռ լուծված չեն. «Եթե բարդություններ չունենային, վաղուց լուծված կլինեին», - ասաց Փաշինյանը։
***
2023-ի սեպտեմբերին Արցախի դեմ իննամսյա շրջափակումից և երկրամասի ամբողջ հայ բնակչության էթնիկ զտումից հետո Ադրբեջանը գերեվարել է Արցախի նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին, Արցախի նախկին պետնախարար Ռուբեն Վարդանյանին, նախկին արտգործնխարար Դավիթ Բաբայանին, ՊԲ նախկին հրամանատար Լևոն Մնացականյանին և ՊԲ հրամանատարի տեղակալ Դավիթ Մանուկյանին։ Նրանց ներկայացված են բազմապիսի կեղծ մեղադրանքներ, որոնք նախատեսում են ընդհուպ մինչև ցմահ ազատազրկում։ Ռազմական դատարանի առջև նրանցից բացի կանգնած է ևս ութ հոգի։
Պատմություններ
