Civilnet
Գևորգ Թոսունյան
Երեք անչափահաս երեխաների ճակատագիրը դատարանում է․ մայրը պահանջում է փոխել երեխաների բնակության վայրը՝ պնդելով, որ հայրը բռնարար է։
Դատարանը սեպտեմբերին կսկսի քննել մի հայցադիմում, որով մայրը՝ Վարսենիկ Սեդրակյանը, պահանջում է վերադարձնել երեք անչափահաս երեխաներին։ Նրանք հիմա հոր՝ Աբրահամ Մարգարյանի տանն են։ Վարսենիկի ներկայացուցիչը՝ փաստաբան Շուշանիկ Արսենյանը, ՍիվիլՆեթին հայտնեց, որ հայրը ոստիկանությունում հաշվառված է որպես բռնություն գործադրող անձ։
Այս գործին ՍիվիլՆեթն ավելի վաղ անդրադարձել էր՝ ներկայացնելով ընտանիքում կատարված դաժանության դեպքերն ու Վարսենիկի ճակատագիրը:
Փաստաբան Շուշանիկ Արսենյանի խոսքով՝ այն բանից հետո, երբ դատարանը նախկինում երեխաների բնակության վայր էր սահմանել հոր տունը, հանգամանքներն էականորեն փոխվել են։
«Հայրը, որը ստանձնել է երեխաների խնամքը, ոստիկանությունում հաշվառվել է որպես բռնարար, ընտանիքում բռնություն գործադրող անձ։ Ես կարծում եմ, որ բռնարար հոր մոտ երեխաներ թողնելը կարելի է ասել, հանցագործություն է, որովհետև եթե անձը ընտանիքում բռնություն է գործադրում, չի բացառվում, որ մի օր նաև իր երեխաների նկատմամբ այդ նույն բռնությունը կիրականացնի»,- նշեց փաստաբանը՝ հավելելով, որ բռնության դեպքը տեղի է ունեցել երեխաների աչքի առաջ։
Լարված իրավիճակ խնամակալության հանձնաժողովի նիստին
Փաստաբանը պատմեց նաև օգոստոսի 14-ին Մարտունիում կայացած՝ խնամակալության և հոգաբարձության հանձնաժողովի նիստից մանրամասներ։ Նրա խոսքով՝ Աբրահամ Մարգարյանը նիստի ընթացքում իրեն պահել է ագրեսիվ և անադեկվատ, անգամ գոռացել է։ Երեխաները հանդիպմանը ներկա են եղել մոր հետ և շատ ծանր են տարել բաժանումը։
«Արձանագրվեց նաև այն փաստը, որ երեխաները մի կերպ պոկվեցին մորից, լացելով գնացին»,- ասաց Արսենյանը։ Նա նկատեց նաև, որ հայրը հոգեբանական ճնշում է գործադրել մեծ դստեր վրա, որպեսզի նա մոտենա իրեն։
Փաստաբանի դիտարկմամբ՝ երեխաները եղել են անխնամ վիճակում։
«Երեխաները կեղտոտ էին, երևի մի երեք-չորս օր լողացած չէին, աչքերը ճպրոտ էին, աղջկա մազերը խնամված չէին»,- նշեց նա։ Ըստ փաստաբանի՝ այս հանգամանքները հաստատել են նաև հանձնաժողովի անդամները, որոնք ավելի վաղ այցելել էին հոր տուն և արձանագրել, որ այն շատ կեղտոտ է եղել։
Նիստի ընթացքում բացահայտվել է նաև, որ Աբրահամ Մարգարյանը ստել է հանձնաժողովին՝ ասելով, թե իր եղբայրը Երևանում աշխատում է, մինչդեռ վերջինս այդ պահին գտնվել է քրեակատարողական հիմնարկում։
Փաստաբանը հավելեց, որ, ի տարբերություն հոր, մայրն ունի կրթություն, աշխատում է, իսկ նրա ընտանիքի անդամները մանկավարժներ են, և երեխաների զարգացման համար անհամեմատ ավելի լավ պայմաններ կստեղծվեն մոր մոտ։
Հանձնաժողովի եզրակացությունը դեռևս պատրաստ չէ, վերջնական որոշումն էլ պետք է կայացնի դատարանը, իսկ դատական առաջին նիստը նշանակված է սեպտեմբերին։
Պատմություններ
