Ութ հարց վարչապետ Նիկոլ Փաշինյանին

Հարգելի՛ վարչապետ Փաշինյան,

Անկախության հռչակագրի ընդունման 35-ամյակի առթիվ Ձեր ելույթում պնդում եք, որ Ղարաբաղյան շարժումը խորհրդային գաղափարախոսության արդյունք էր և իրականում մշակվել ու օգտագործվել է կանխելու համար մեր պետության, Իրական Հայաստանի Հանրապետության ստեղծումը, ինչպես Դուք եք անվանում, 29,743 քառակուսի կիլոմետր տարածքով։

Անկեղծ ասած, եթե այդպես է, ապա ուզում եմ Ձեզ ուղղել հետևյալ հարցերը:

- Եթե ղարաբաղյան շարժումը ներշնչված էր խորհրդային գաղափարախոսությամբ և հավակնություններով, արդյո՞ք դա նշանակում է, որ երբ Ստեփանակերտում վանկարկում էիք «Ղարաբաղը Հայաստան է և վերջ», այդ պահին գտնվում էիք խորհրդային գաղափարախոսության ազդեցության տակ:

- Եթե այդպես է, ապա ինչպե՞ս Ձեզ հաջողվեց դուրս գալ խորհրդային գաղափարախոսության ազդեցությունից:

- Եթե Ղարաբաղյան շարժումը խորհրդային նախագիծ էր, ինչո՞ւ խորհրդային առաջնորդները մերժեցին Ղարաբաղի հայերի՝ Հայկական Խորհրդային Սոցիալիստական Հանրապետությանը միանալու անթիվ փորձերը:

- Համաձա՞յն եք, որ ավելի քան 4,000 հայ զինվորներ, որոնց ուղարկեցիք պատերազմ և որոնք այդպես էլ չվերադարձան իրենց ընտանիքների մոտ, իզուր են զոհվել:

- Ի՞նչ կասեք Արցախից 150,000 հայերի էթնիկ զտման մասին, չէ՞ որ դրա արդյունքում ստեղծվեց «իրական» Հայաստանը:

- Ադրբեջանն իրավունք ունե՞ր իրականացնելու 150,000 հայերի էթնիկ զտումը Արցախում։

– Ձեր խոսքում նշեցիք, որ «Հայաստանի Հանրապետությունն այսօր ավելի անկախ է, քան երբևէ, ավելի ինքնիշխան է, քան երբևէ»։ Եթե այդպես է, ապա ինչպե՞ս է ստացվել, որ Հայաստանի ինքնիշխան տարածքը բռնազավթած բռնապետը կարող է Ձեզ հրամայել փոխել մեր Սահմանադրությունը։

- Երբևէ մտածե՞լ եք, որ վերջին հինգ տարիների ընթացքում մեր ժողովրդին պատուհասած արհավիրքների համար պատասխանատվության Ձեր բաժինը ստանձնելու անկարողությունը իրականում խորհրդային գաղափարախոսության ժառանգություն է: