Ավստրալիան Իրանի դեմ դիվանագիտական պատերազմ է սկսել Իսրայելի պատճառով

Ավստրալիայի կառավարությունը պաշտոնապես մեղադրել է Իրանի Իսլամական հեղափոխության պահապանների կորպուսին Ավստրալիայում կազմակերպված հակասեմական հարձակումների մեջ։

Ավստրալիայի ազգային անվտանգության ծառայությունը հաստատել է, որ Մելբուռնում գտնվող «Ադաս Իսրայել» սինագոգի և Սիդնեյի հրեական սննդի հաստատության վրա իրականացված հարձակումները համակարգվել են Իրանի կողմից։

Արձագանքելով այս գործողություններին՝ Ավստրալիայի վարչապետ Էնթոնի Ալբանեզը հայտարարել է Իրանի դեսպանի՝ Ահմադ Սադեղիի արտաքսման մասին։  Միաժամանակ, Ավստրալիան ժամանակավորապես փակել է իր դեսպանատունը Թեհրանում։

Կառավարությունը նաև հայտարարել է, որ պատրաստվում է  Իրանի հեղափոխական պահապանների կորպուսը պաշտոնապես ճանաչել որպես ահաբեկչական կազմակերպություն։

Իրանի իշխանությունները հերքել են մեղադրանքները՝ դրանք որակելով որպես «քաղաքական մանիպուլյացիա»։ Սակայն Ավստրալիայի հրեական համայնքն ու Իսրայելի դեսպանատունը ողջունել են երկրի կտրուկ և հստակ արձագանքը։

Ավստրալիայի արտաքին գործերի նախարարությունը հորդորել է իր քաղաքացիներին հեռանալ Իրանից՝ հաշվի առնելով անվտանգության աճող վտանգները։