Դատարանի այսօրվա վերդիկտը լրջագույն հարված է արդարադատությանը․ Մայր Աթոռ

Մայր Աթոռ Սուրբ Էջմիածինը խստորեն դատապարտում է «Միքայել արքեպիսկոպի նկատմամբ ապօրինի գործընթացը և օրենքով սահմանված բոլոր հնարավորություններն օգտագործելու է՝ հասնելու նրա հանդեպ արդարության վերականգնմանը»:

«Տ․ Միքայել արքեպիսկոպոս Աջապահյանին ակնհայտ շինծու մեղադրանքներով մեղավոր ճանաչելու դատարանի այսօրվա վերդիկտը լրջագույն հարված հասցրեց Հայաստանում արդարադատությանը և արդարադատության մարմինների հեղինակությանը:

Երկրում շարունակ սերմանվող ատելության և բռնաճնշումների պայմաններում կայացված ամոթալի այս դատական ակտը հերթական անգամ հաստատեց, որ ՀՀ-ում դատաիրավական համակարգն ամբողջությամբ կախվածության մեջ է քաղաքական իշխանության կամքից։

Ցավալի է արձանագրել, որ հայրենի մեր երկրում արդարադատությունն ընտրողական է և կամայական որոշումներով անթաքույց ծառայեցվում է քաղաքական քինախնդրությանը»,- նշվում է հայտարարության մեջ ։

Սեպտեմբերի 24-ին առաջին ատյանի դատարանը Շիրակի թեմի առաջնորդ Միքայել արքեպիսկոպոս Աջապահյանին մեղավոր է ճանաչել ռազմական հեղաշրջման կոչեր անելու մեղադրանքով։

Նախագահող դատավոր Արմինե Մելիքսեթյանը նաև որոշում կայացրեց անփոփոխ թողնել սրբազանի խափանման միջոց կալանքը՝ սահմանափակումներով, օրինակ՝ լրատվամիջոցների հետ չզրուցելու։

Հաջորդ դատական նիստը նշանակվեց սեպտեմբերի 29-ին, որի ընթացքում կորոշվի նրա պատժաչափը։