Մերձավանում տեղի ունեցած սպանության ֆոնին պաշտոնանկություններ՝ Արմավիրում

Մերձավանում սեպտեմբերի 23-ի ուշ գիշերը Փարաքարի համայնքապետի սպանության ֆոնին այսօր պաշտոնից ազատվել են Քննչական կոմիտեի և ոստիկանության Արմավիրի մարզային ստորաբաժանումների ղեկավարներ։

Քննչական կոմիտեի նախագահ Արթուր Պողոսյանի ստորագրած հրամանագրով իր դիմումի հիման վրա ազատվել է ՔԿ Արմավիրի մարզային քննչական վարչության պետ Հրաչյա Ղազարյանը։ Այս մասին տեղեկացնում է Քննչական կոմիտեն։

Նույն գործի շրջանակում՝ պաշտոնանկ է արվել նաև Հայաստանի ներքին գործերի նախարարության ոստիկանության քրեական ոստիկանության Արմավիրի մարզային վարչության պետ, ոստիկանության գնդապետ Արթուր Բդոյանը։ Տեղեկությունը հաստատել է ՆԳՆ մամուլի խոսնակ Նարեկ Սարգսյանը։

Սեպտեմբերի 23-ին՝ ժամը 23.52-ին Արմավիրի մարզի Մերձավան բնակավայրի Երևանյան խճուղում կրակոցներ են հնչել։ Կա 2 զոհ, 1 վիրավոր։ Մահացածներից մեկը Փարաքար համայնքի ղեկավար Վալոդյա Գրիգորյանն է։

Աղմկահարույց սպանությունից 2 օր է անցել, սակայն դեռևս իրավապահ մարմինները տեղեկություն չեն հաղորդել հանցագործի հայտնաբերման մասին: