Նիկոլ Փաշինյանն իրատեսական չի համարում ԼՂ-ից տեղահանվածների վերադարձը

Վարչապետ Նիկոլ Փաշինյանը Եվրոպայի խորհրդի խորհրդարանական վեհաժողովում հայտարարել է, որ իրատեսական չի համարում Լեռնային Ղարաբաղից տեղահանվածների վերադարձը, փոխարենն այդ թեման վտանգավոր է համարում խաղաղության գործընթացի համար։   

«Ես ուղիղ ասում եմ՝ ես դա իրատեսական չեմ համարում։ Ավելին՝ կարևոր եմ համարում մարդկանց ազնիվ այդ մասին ասելը, որովհետև մարդիկ պետք է իրենց հեռանկարը և պլանները կառուցեն»,- ասաց վարչապետը։

Ըստ Փաշինյանի, Հայաստանն ու Ադրբեջանը պետք է «հանգիստ թողնեն իրար և պետք է կենտրոնանան տնտեսական համագործակցություն և երկխոսություն կառուցելու վրա»։

«Ղարաբաղի մեր հայրենակիցները պետք է տնավորվեն Հայաստանի Հանրապետությունում և որպես Հայաստանի Հանրապետության քաղաքացի ապրեն, ստեղծագործեն, իրենց բարեկեցությունը կառուցեն Հայաստանի Հանրապետությունում։ Սա է մեր ռազմավարությունը»,- ասաց վարչապետը։