Ռուբեն Վարդանյանի կալանքի գործով որոշում կայացրած ՄԱԿ անդամը սերտ կապեր ունի Ադրբեջանի հետ

Միջազգային քրեական դատարանի նախկին գլխավոր դատախազ Լուիս Մորենո Օկամպոյի փորձագիտական կարծիքի համաձայն՝ ՄԱԿ-ի աշխատանքային խմբի անդամ Գաննա Յուդկիվսկան, որը մասնակցել է Ռուբեն Վարդանյանի կալանքի գործով որոշման կայացմանը, ունի շահերի բախում, ինչը անվավեր է դարձնում այդ որոշումը։ Այս մասին հաղորդագրություն է տարածել Free Armenian Hostages-ը։

Ըստ հրապարակման, ՄԱԿ-ի կամայական կալանքի հարցերով աշխատանքային խումբը 2025-ի փետրվարի 17-ին  զեկույց էր հրապարակվել, թե Ադրբեջանի կողմից Ռուբեն Վարդանյանի կալանավորումը կամայական չէ։ Սակայն Օկամպոյի զեկույցը բացահայտում է, որ այդ որոշումը կայացրած խմբի անդամ Գաննա Յուդկիվսկան ունի մասնագիտական, ֆինանսական և անձնական սերտ կապեր Ադրբեջանի հետ։

Մասնավորապես, նշվում է, որ Յուդկիվսկան «Equity» իրավաբանական ընկերության անդամ է, որը ներկայացնում է Ադրբեջանի պետական նավթային ընկերության (SOCAR) շահերը։ Բացի այդ, նրա ամուսինը՝ Գեորգի Լոգվինսկին, քաղաքական կապեր ունի Ադրբեջանի ղեկավարության հետ և հրապարակավ պաշտպանել է Լեռնային Ղարաբաղի հարցում Ադրբեջանի դիրքորոշումը։

Զեկույցում նշվում է, որ այս կապերը հակասում են ՄԱԿ-ի մի շարք կանոնների, որոնք պահանջում են անկախություն, անաչառություն և ինքնաբացարկ՝ շահերի բախման դեպքում։ Այս հանգամանքը Ռուբեն Վարդանյանի փաստաբանական խմբին հնարավորություն է տալիս պահանջելու որոշման վերանայում։