Civilnet
Հայաստանյայց առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանի պաշտպան Արա Զոհրաբյանն իր ֆեյսբուքյան էջում ահազանգել է, որ քրեակատարողական հիմնարկներում առկա է արատավոր պրակտիկա՝ զննում են փաստաբանների կողմից իրենց կալանավորված վստահորդներին փոխանցված փաստաթղթերը։
«Քրեակատարողական հիմնարկների աշխատակիցները (ՔԿՀ) զննում են (գրաքննում) փաստաբանների կողմից իրենց կալանավորված վստահորդներին փոխանցված փաստաթղթերը: Ընդ որում, եթե փոխանցված նյութը, ըստ ՔԿՀ աշխատակիցների, քրեական գործի հետ ուղիղ չի առնչվում, ապա վերցնում են կալանավորված անձի ձեռքից»,- գրում է Զոհրաբյանը։
Փաստաբանը բողոք էր ներկայացրել առաջին ատյանի դատարան, որը մակագրվել է Միքայել Սրբազանին կալանավորած դատավոր Մասիս Մելքոնյանին, սակայն, ըստ փասատաբանի, դատավորը խախտում չի գտել և բողոքը մերժել է։
Ըստ Զոհրաբյանի՝ Վերաքննիչ քրեական դատարանի դատավոր Լուսինե Աբգարյանը հոկտեմբերի 6-ի որոշմամբ բավարարել է իր բողոքը՝ բեկանելով դատավոր Մասիս Մելքոնյանի որոշումը և հաստատելով Միքայել Սրբազանի իրավունքների և օրինական շահերի խախտման փաստը: Վերաքննիչ դատարանը նաև պարտավորեցրել է «Երևան-Կենտրոն» քրեակատարողական հիմնարկի պետին միջոցներ ձեռնարկել արձանագրված խախտումները վերացնելու ուղղությամբ:
«Վերաքննիչ դատարանի որոշումը կարևոր դատական ակտ է այս արատավոր պրակտիկան վերացնելու համար»,- գրել է փաստաբանը։
Միքայել արքեպիսկոպոս Աջապահյանին դատապարտել են 2 տարվա ազատազրկման՝ կալանավորման պահից հաշված: Նա մեղավոր չի ճանաչում և մեղադրանքը համարում է քաղաքական, իսկ պաշտպանները քննությունը գնահատում են «խախտումներով»: Աջապահյանին մեղադրանք է առաջադրվել 2024 և 2025 թվականներին լրատվության միջոցով իշխանությունը զավթելու կոչեր հնչեցնելու համար:
Պատմություններ
