Վալոդյա Գրիգորյանի սպանության գործով նոր եզրակացություն. Գևորգ Հարությունյանի ԴՆԹ-ն հայտնաբերվել է իրերի վրա

Մերձավանում տեղի ունեցած սպանության դեպքի առթիվ նախաձեռնված քրեական վարույթի նախաքննության ընթացքում ստացվել է դատագենետիկական փորձաքննության եզրակացությունը։ Այս մասին հայտնում են Քննչական կոմիտեից։

Համաձայն եզրակացության՝ խուզարկությամբ հայտնաբերված իրերի, մասնավորապես՝ հեռադիտակի մակերեսից ու ուսակապիչից և կարմիր գույնի ձեռնոցներից անջատված ԴՆԹ-ները համընկնում են մեղադրյալ Գևորգ Հարությունյանին բնորոշ գենետիկական բնութագրին։

Ավելի վաղ հայտնի էր դարձել, որ Փարաքարի համայնքապետ Վալոդյա Գրիգորյանի սպանության համար մեղադրվող Գևորգ Հարությունյանին իրավապահները հոկտեմբերի 6-ի առավոտյան ուղեկցել էին Մերձավանի գերեզմանոց։

Սեպտեմբերի 23-ին Արմավիրի մարզի Մերձավան բնակավայրում սպանվել էին Փարաքարի համայնքապետ Վալոդյա Գրիգորյանը և նրա ընկերը՝ քրեական ոստիկան Կարեն Աբրահամյանը։ Գործով կալանավորված են Մերձավանի բնակիչներ Նարեկ Օհանյանն ու Գևորգ Հարությունյանը։

Հոկտեմբերի սկզբին իրավապահները հայտարարել էին միջադեպը բացահայտելու մասին։ Նարեկ Օհանյանին մեղադրանք է առաջադրվել սպանությանն օժանդակելու, իսկ Գևորգ Հարությունյանին՝ սպանության, սպանության փորձի և զենքի ապօրինի շրջանառության հոդվածներով։

Նարեկ Օհանյանը փետրվարի 5-ին Մերձավանում սպանված Գրիգոր Օհանյանի եղբայրն է, իսկ Գևորգ Հարությունյանը՝ Օհանյան եղբայրների ընկերը։