Civilnet
Փաստաբան Ալեքսանդր Կոչուբաևի պաշտպան Էրիկ Ալեքսանյանը դիմել է Գլխավոր դատախազին՝ վերացնել Կոչուբաևի նկատմամբ ընտրված խափանման միջոց կալանքը։ Էրիկ Ալեքսանյանն իր ֆեյսբուքյան էջում նշել է, որ իր դիմումի պատճառն այն է, որ երեխայի ծնվելուց հետո Կոչուբաևի կնոջ առողջական վիճակը կտրուկ վատթարացել է։
Սիվիլնեթը Գլխավոր դատախազի խորհրդական Լուսինե Մարտիրոսյանից հետաքրքրվեց, թե ինչ փուլում է դիմումը․
«Գլխավոր դատախազին հասցեագրված դիմումը քիչ առաջ է մուտքագրվել ու գտնվում է քննարկման փուլում»,- ասաց Մարտիրոսյանը։
Կոչուբաևի պաշտպան Էրիկ Ալեքսանյանը ֆեյսբուքում հրապարակած դիմումի տեքստում գրել է․
«Հարգելի տիկին Վարդապետյան նկատի ունենալով այն հանգամանքը, որ փաստաբան Ալեքսանդր Կոչուբաևի վերաբերյալ քրեական վարույթը մեղադրական եզրակացությամբ դեռևս չի փոխանցվել դատարան, խնդրում եմ Ձեզ օգտվել բացառիկ լիազորությունից և վերացնել Ալեքսանդր Կոչուբաևի նկատմամբ ընտրված խափանման միջոց կալանքը, քանզի վերջինիս երեխայի ծնվելուց հետո կնոջ առողջական վիճակը կտրուկ վատթարացել է։ Նկատի ունենալով, որ նշվածը բժշկական գաղտնիք է, ուստի չեմ կարող հրապարակային հայտնել կոնկրետ այն անդառնալի հետևանքի մասին, որն առաջացել է Կոչուբաևի ընտանիքում, սակայն համապատասխան բժշկական տեղեկանքը րոպեների ընթացքում կներկայացվի Ձեզ»։
***
Փաստաբան Ալեքսանդր Կոչուբաևը հոկտեմբերի 17-ին երկու ամսով կալանավորվել է։ Կալանքի պատճառը դատավորի, դատախազի, քննիչի մասին արատավորող հրապարակումներն են։
Պատմություններ
