Civilnet
Արարատ Միրզոյանի ծեծի գործով մեղադրյալ Թորգոմ Ասատրյանը դատապարտվեց 5 տարի 6 ամիս ազատազրկման՝ ԱԺ նախագահի (խմբ․ 2020-ին Միրզոյանն ԱԺ նախագահն էր) նկատմամբ բռնության համար։
Գործով մեղադրող կողմը դատարանից պահանջել էր կիրառել առավելագույն պատժաչափը՝ 7 տարի ազատազրկում։ Դատախազն իր պահանջը հիմնավորել էր նրանով, որ մեղադրյալը հանցանքը կատարել է խմբով, այն էլ՝ առանձնակի դաժանությամբ և ռազմական դրության պայմաններում։
Արարատ Միրզոյանի (այն ժամանակ՝ ՀՀ Ազգային ժողովի նախագահ) ծեծի դեպքը տեղի է ունեցել 2020-ի նոյեմբերի 9-ի լույս 10-ի գիշերը, Արցախյան երկրորդ պատերազմի ավարտը հայտարարող եռակողմ հայտարարության ստորագրումից հետո։
Եռակողմ հայտարարության հրապարակումից հետո Երևանում սկսվեցին զանգվածային անկարգություններ և բողոքի ակցիաներ։ Ցուցարարները ներխուժեցին ՀՀ Կառավարության և Ազգային ժողովի վարչական շենքեր։
Ծեծը տեղի է ունեցել Ազգային ժողովի շենքի մոտակայքում, երբ Արարատ Միրզոյանը գտնվում էր իր ավտոմեքենայում: Ծեծի հետևանքով Միրզոյանը մարմնական վնասվածքներ էր ստացել, վնասվել էր նրա աչքը։
Պատմություններ
