Կաթողիկոսի եղբորն ու եղբորորդուն ձերբակալել են․ փաստաբան

Ամենայն հայոց կաթողիկոս Գարեգին Երկրորդի եղբայրը՝ Գևորգ Ներսիսյանն ու վերջինի որդին՝ Համբարձում Ներսիսյանը ցուցմունք են տվել, նրանց ձերբակալել են: Այս մասին հայտնել է փաստաբան Արա Զոհրաբյանը:

«Գևորգ Ներսիսյանը և որդին՝ Համբարձում Ներսիսյանը ձերբակալված են: Ցուցմունքներ են տվել, ներկայացվել է տեսագրությունը քննիչին: Սպասում ենք, թե ինչ որոշում կընդունեն: 12 ժամվա ընթացքում պետք է դատարան դիմեն կալանքի համար կամ ազատ արձակեն» ,- գրել է Զոհրաբյանը։

Արա Զոհրաբյանի խոսքով՝ Ներսիսյաններին մեղադրում են խուլիգանության և քարոզչությանը խոչընդոտելու արարքներ կատարելու մեջ, մինչդեռ չկա նույնիսկ հանցագործությանը նմանվող դեպք:

Քննչական կոմիտեից հայտնել են, որ Գարեգին Երկրորդի եղբայրն ու եղբորորդին ձերբակալվել են նախընտրական քարոզչությանը խոչընդոտելու մեղադրանքով։

«Ամենայն Հայոց Կաթողիկոս Գարեգին Երկրորդի եղբոր՝ Գևորգ Ներսիսյանի և վերջինիս որդու՝ Համբարձում Ներսիսյանի նկատմամբ հանրային քրեական հետապնդում է հարուցվել Քրեական օրենսգրքի 211-րդ հոդվածով (քարոզչություն կատարելուն կամ քարոզչություն կատարելուց հրաժարվելուն հարկադրելը կամ քարոզչություն կատարելուն այլ կերպ խոչընդոտելը)»,- հայտնել են ՔԿ-ից:

Զոհրաբյանը հայտնել է, որ նոյեմբերի 2-ին Քննչական կոմիտեն Ամենայն Հայոց Կաթողիկոսի 68-ամյա եղբորը՝ Գևորգ Ներսիսյանին և նրա որդուն՝ Համբարձում Ներսիսյանին կալանավորման նպատակով դատարան տանելու համար ձերբակալելու որոշում է կայացրել:

Վաղարշապատ խոշորացված համայնքում «Հանրապետություն» կուսակցության թեկնածու Հարություն Մկրտչյանը «Ֆեյսբուք»-ի իր էջում գրառում է կատարել, որով հայտնել է, որ նոյեմբերի 1-ին ժամը 16:10-ի սահմաններում, Կաթողիկոսի եղբայրը՝ Գևորգ Ներսիսյանը իր որդիների հետ խոչընդոտել է նախընտրական քարոզչությանը: