3-ամյա երեխայի սպանության գործով նրա հայրը ձերբակալվել է․ ՔԿ

Ծափաթաղում անհետացած 3-ամյա երեխայի սպանության դեպքի առթիվ նախաձեռնված քրեական վարույթի նախաքննության ընթացքում կատարվել է դիակի արտաքին զննություն: Դիակի մարմնի, գլխի շրջանում հայտնաբերվել են մարմնական վնասվածքներ: Այս մասին հայտնել է Քննչական կոմիտեի մամուլի խոսնակ Կիմա Ավդալյանը։

Նախաքննության ընթացքում նշանակվել է դիակի դատաբժշկական փորձաքննություն:

Մեկ անձի նկատմամբ հարուցվել է հանրային քրեական հետապնդում՝ Քրեական օրենսգրքի 155-րդ հոդվածի 2-րդ մասի 3-րդ, 5-րդ և 9-րդ կետերով (սպանությունը): Վերջինս ձերբակալվել է:

ՆԳ նախարար Արփինե Սարգսյանը հայտնել է, որ նախնական տվյալներով տեղի է ունեցել սպանություն, հայրը խեղդամահ անելու ճանապարհով սպանել է փոքրիկին։

Հոկտեմբերի 27-ից Գեղարքունիքի մարզի Ծափաթաղ գյուղում որոնվում էր անհետ կորած համարվող 3-ամյա Տիգրանը։ Նրա մարմինը հայտնաբերվել է նոյեմբերի 2-ին Ծափաթաղ բնակավայրի հարակից դաշտամիջյան հատվածում։