Civilnet
Հայաստանի ԱԳ նախարար Արարատ Միրզոյանը հույս ունի, որ առաջիկայում կբացվի Գյումրի-Կարս երկաթուղին։ Նա այս մասին ասել է լրագրողների հետ ճեպազրույցի ժամանակ։
Արարատ Միրզոյանի խոսքով՝ Հայաստանն ամենօրյա երկխոսության մեջ է Թուրքիայի հետ և ազդակներ է ստանում արևմտյան հարևանից։
«Մենք Թուրքիայի հետ ունենք գրեթե ամենօրյա երկխոսություն, և այս երկխոսության վերջնանպատակը, իհարկե, սահմանների բացումն ու դիվանագիտական հարաբերությունների հաստատումն է։ Ես հույս ունեմ, որ առաջիկայում մենք կունենանք շատ շոշափելի արդյունքներ այս ճանապարհին։ Դրանց մի մասը Գյումրի-Կարս երկաթուղու բացումն է»,- ասաց նախարարը։
***
Վերջին շրջանում Հայաստանի իշխանություններն ամենաբարձր մակարդակով հայտարարում են Թուրքիայի հետ սպասվող շոշափելի ձեռքբերումների մասին։
Օրեր առաջ վարչապետ Նիկոլ Փաշինյանը հայտարարել էր, որ Թուրքիայի հետ ծավալած դրական երկխոսությունը հույս է տալիս, որ կարող է առաջիկայում բացվել Հայաստան-Թուրքիա սահմանը:
Հայ-թուրքական հարաբերությունների կարգավորման գործընթացը մեկնարկել է 2022-ի սկզբին։
2022-ի հուլիսի 1-ին Հայաստանի և Թուրքիայի հատուկ ներկայացուցիչներ Ռուբեն Ռուբինյանը և Սերդար Քըլըչը Վիեննայում պայմանավորվել էին հնարավոր ամենասեղմ ժամկետներում Հայաստան-Թուրքիա ցամաքային սահմանը հատելու հնարավորություն ապահովել Հայաստան և Թուրքիա այցելող երրորդ երկրների քաղաքացիների և դիվանագիտական անձնագիր ունեցողների համար։ Մինչ օրս, սակայն, պայմանավորվածությունը կյանքի չի կոչվել։
Պատմություններ
