Civilnet
Պետական պահպանության ծառայությունը պետական պահպանություն չի իրականացրել և չի իրականացնում Օհանավանի Հովհաննավանք եկեղեցում Ստեփան Ասատրյանի (նախկինում՝ Տեր Արամ քահանա) պահպանությունը։ Այդ մասին ի պատասխան ՍիվիլՆեթի գրավոր հարցին հայտնեցին ՀՀ վարչապետի աշխատակազմից։
Ստեփան Ասատրյանը նոյեմբերի 2-ին Օհանավանի Հովհաննավանք եկեղեցում երկրորդ կիրակին անընդմեջ «պատարագ» մատուցեց, որին կրկին մասնակցել էր Հայաստանի վարչապետ Նիկոլ Փաշինյանը։ Նրան այդ միջոցառումներից առաջ ուղեկցում էին քաղաքացիական հագուստով անձինք։ Լրատվամիջոցները գրել էին, որ այդ անձինք Պետական պահպանության ծառայությունից են։ ՊՊԾ-ն փաստորեն հերքում է այս տեղեկությունը։
Բացի այդ, վանքում և դրա տարածքում ծառայություն էին իրականացնում նաև ոստիկանները՝ անգամ շաբաթվա մյուս օրերին։
Նոյեմբերի 3-ին ԱԺ–ում ճեպազրույցի ժամանակ, Ներքին գործերի նախարար Արփինե Հովհաննիսյանն ավելի վաղ հայտնել էր, որ ոստիկանությունը Հովհաննավանքում հասարակական կարգ և անվտանգություն է ապահովում, որպեսզի «նման իրավիճակները կառավարելիության դաշտում լինեն»։
Բացի այդ, նա պարզաբանել էր, որ Քննչական կոմիտեն որոշում է կայացրել պաշտպանական միջոցներ կիրառել, ուստի ոստիկանները ուղեկցում են կարգալույծ քահանային և հսկողություն իրականացնում նրա տան մոտ։
Պատմություններ
