Հայաստանն ԱԶԲ-ից վարկ կվերցնի՝ Արցախից տեղահանվածների բնակարանային լուծումների համար

Հայաստանի կառավարությունը հավանություն տվեց Ասիական զարգացման բանկի (ԱԶԲ) կողմից 250 մլն դոլարի վարկի տրամադրմանը, որը նախատեսված է «Կենսունակության բարելավման և հզորացման համար բնակարանային բարեփոխումներ» (THRIVE) ծրագրի իրականացմանը։

Նախագծի հիմնավորման մեջ նշված է, որ ծրագիրն ուղղված է կայուն, դիմացկուն և ներառական բնակարանային համակարգի զարգացմանը և շուրջ 109,000 էթնիկ հայ փախստականների (խմբ․ Արցախից բռնի տեղահանված հայերի) երկարաժամկետ բնակարանային լուծումների ապահովմանը։ Ֆինանսավորումը կներառի նաև Արտոնյալ ֆինանսավորման գլոբալ գործիքի հիմնադրամի (GCFF) 16,45 մլն դոլար դրամաշնորհ։

Կառավարության տվյալներով՝ աջակցությունը համահունչ է 2021–2026-ի պետական ծրագրի նպատակներին, ներառյալ կացարանի կարիք ունեցող ընտանիքների բնակարանային պայմանների բարելավումը։ 2024-ի հաստատված բնակարանային աջակցության ծրագրով Ղարաբաղից տեղահանված 3344 ընտանիք ստացել է հավաստագիր, որոնցից 1263-ը այն իրացրել է, պետական վճարումները գերազանցել են 2 մլրդ դրամը։

Վարկը տրամադրվում է SOFR + 0,8% լողացող տոկոսադրույքով, որը 2025-ի հոկտեմբերի 30-ի SOFR-ի 4,04% մակարդակի հիման վրա կազմում է 4,84%։ Մայր գումարի մարման 34 կիսամյակային վճարումները կսկսվեն 2035-ի դեկտեմբերի 15-ին և կավարտվեն 2052-ի հունիսի 15-ին։ Վարկի ընդհանուր ժամկետը 27 տարի է, ներառյալ 10 տարվա արտոնյալ շրջան։

Պայմանագիրը հնարավորություն է տալիս փոխարկել վարկի արժույթը կամ փոխել տոկոսադրույքը։