Վարդան Ղուկասյանին նոր մեղադրանք է ներկայացվել

Գյումրիի քաղաքապետ Վարդան Ղուկասյանին նոր մեղադրանք է ներկայացվել։ Նույն մեղադրանքը ներկայացվել է նաև նրա որդուն՝ խուլիգանություն։ Այս մասին ՍիվիլՆեթին հայտնեցին Քննչական կոմիտեից։

«Քրեական վարույթի նախաքննության ընթացքում 2 անձի նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 2-րդ մասի 1-ին և 3-րդ կետերով (մի խումբ անձանց կողմից տեղեկատվական կամ հաղորդակցական տեխնոլոգիաներն օգտագործելով կատարված խուլիգանությունը)»,- հայտնեցին կոմիտեից:

Նոյեմբերի 20-ին Քննչական կոմիտեն հայտնել էր, որ ձերբակալվել է Վարդան Ղուկասյանի որդին՝ Սպարտակ Ղուկասյանը։

Ավելի վաղ Սպարտակ Ղուկասյանի նկատմամբ խափանման միջոց էր կիրառվել տնային կալանքը: Նրա հայրը՝ Գյումրու քաղաքապետ Վարդան Ղուկասյանն ասել էր, որ որդու դեմ նախաձեռնված իրավական գործընթացն իրականում իր դեմ է, բայց նման քայլերով իրեն չեն կոտրի։

***

Հոկտեմբերի 20-ին Հակակոռուպցիոն կոմիտեն քննչական գործողություններ է իրականացրել Գյումրիի համայնքապետարանում։

Հակակոռուպցիոն կոմիտեից հայտնել են, որ փաստական տվյալներ են ստացվել Գյումրի համայնքի ղեկավարի և գլխավոր ճարտարապետի կողմից նախնական համաձայնությամբ կաշառք–գումարներ պահանջելու և ստանալու դեպքերի վերաբերյալ։ Հոկտեմբերի 21-ին Վարդան Ղուկասյանը երկու ամսով կալանավորվել է։ Նույն օրը Ղուկասյանի պաշտոնավարումը կասեցնելու մասին որոշում է կայացվել։