Civilnet
Երևանի ընդհանուր իրավասության քրեական դատարանը՝ դատավոր Կարեն Ֆարխոյանի նախագահությամբ, նոյեմբերի 27-ին որոշում կայացրեց փոխել Բագրատ սրբազանի և մյուսների գործով անցնող միակ կնոջ՝ Լիդյա Մանթաշյանի խափանման միջոցը։
Դատարանի որոշմամբ՝ Մանթաշյանի նկատմամբ ընտրված կալանավորումը վերացվեց։ Փոխարենը կիրառվեցին համակցված խափանման միջոցներ՝ վարչական հսկողություն, գրավ և բացակայելու արգելք։
Որոշման հրապարակումից հետո դատավոր Ֆարխոյանը մեղադրյալին պարզաբանել է փոփոխված պայմաններում նրա իրավունքներն ու պարտականությունները, ինչպես նաև սահմանված սահմանափակումները խախտելու իրավական հետևանքները։
Լիդյա Մանթաշյանն իրեն առաջադրված մեղադրանքը չի ընդունում։ Նա դատարանում հայտարարել է, որ ահաբեկչական որևէ գործողություն չի պլանավորել և նման մտադրություն չի ունեցել։
Խափանման միջոցի համար միջնորդել էր պաշտպանական կողմը, իսկ մեղադրողները չէին առարկել․ «Գտնում ենք, որ այլընտրանքային խափանման միջոցներն ի զորու են ապահովել մեղադրյալի այն իրավաչափության ռիսկերը այն պայմաններում, որ նախանշված են եղել»,- ասաց հանրային մեղադրողներից մեկը։
***
Բագրատ արքեպիսկոպոս Գալստանյանն ու մի խումբ անձինք մեղադրվում են իշխանությունը յուրացնելու նախապատրաստության մեջ։ Ըստ մեղադրական եզրակացության՝ «Սրբազան պայքար» շարժման միջոցով սահմանադրական ճանապարհով իշխանության հասնելու փորձի ձախողվելուց հետո՝ 2024-ի նոյեմբերից, Բագրատ սրբազանն ու շարժման մի շարք մասնակիցներ խմբով նախապատրաստվել են իշխանությունը զավթելուն։ Մեղադրանքի համաձայն՝ նրանք ձեռք են բերել «ահաբեկչություն կատարելու և իշխանությունը զավթելու համար անհրաժեշտ միջոցներ ու գործիքներ»։
Պատմություններ
