Կարեն Անդրեասյանը Լոնդոնում կմասնակցի TRIPP նախագծի պայմանագրային փաթեթի մշակմանը

Վարչապետի որոշմամբ միջազգային իրավական հարցերով ներկայացուցիչ Կարեն Անդրեասյանը դեկտեմբերի 8-12-ը կգործուղվի Լոնդոն՝ «TRIPP» նախագծի միջպետական պայմանագրային փաթեթի մշակման աշխատանքները «Fieldfisher LLP» իրավաբանական ընկերության հետ իրականացնելու նպատակով։ Այս մասին տեղեկանում են հրապարակված որոշումից: 

Դեկտեմբերի 15-18-ն Անդրեասյանը Լոնդոնից կմեկնի Նիդերլանդների Թագավորություն (Հաագա)՝ Միջազգային արդարադատության դատարանում քննվող երկու գործերի շրջանակներում ընթացակարգային հարցերի վերաբերյալ տեսակետները ներկայացնելու համար։

***

Օգոստոսի 8-ին Վաշինգտոնում Հայաստանի վարչապետ Նիկոլ Փաշինյանի, Ամերիկայի Միացյալ Նահանգների նախագահ Դոնալդ Թրամփի և Ադրբեջանի նախագահ Իլհամ Ալիևի եռակողմ հանդիպմանը ստորագրվել է համատեղ Հռչակագիր:

Հռչակագրի համաձայն՝ Հայաստանի տարածքով կապ կստեղծվի Ադրբեջանի հիմնական մասի և Նախիջևանի միջև։ Այդ ճանապարհը կկոչվի «Թրամփի ուղի՝ հանուն միջազգային խաղաղության և բարգավաճման» («Trump Route for International Peace and Prosperity» (TRIPP))։ Ծրագրի իրականացման շրջանակը սահմանելու նպատակով Հայաստանի Հանրապետությունն աշխատելու է Ամերիկայի Միացյալ Նահանգների և փոխադարձաբար համաձայնեցված երրորդ կողմերի հետ։