Civilnet
Հայաստանը պաշտոնապես հաշվի է առնում Իրանի կենսական շահերը Վաշինգտոնյան գործընթացի շրջանակներում և հավատարիմ է մնում Թեհրանի հետ ձևավորված փոխվստահության մթնոլորտին։ Այս մասին «Թասնիմ» լրատվական գործակալությանը տված հարցազրույցում հայտարարել է Իրանում ՀՀ արտակարգ և լիազոր դեսպան Գրիգոր Հակոբյանը՝ պարզաբանելով, որ տարածաշրջանային հաղորդակցությունների վերականգնման նոր նախագիծը՝ TRIPP-ը, հիմնված է բացառապես պետությունների ինքնիշխանության, տարածքային ամբողջականության և իրավազորության սկզբունքների վրա։
Այս պարզաբանումները հաջորդել են Իրանի հեղափոխության առաջնորդի միջազգային հարցերի խորհրդական Ալի Աքբար Վելայաթիի մտահոգություններին։ Վերջինս հայտարարել էր, թե «Թրամփի ուղին» ոչնչով չի տարբերվում «Զանգեզուրի միջանցքից» և կարող է ճանապարհ հարթել տարածաշրջանում ԱՄՆ-ի ու ՆԱՏՕ-ի ներկայության համար։ Վելայաթին շեշտել էր, որ Իրանը դեմ է սահմանների ցանկացած փոփոխության և ամերիկյան ընկերությունների մուտքին զգայուն տարածաշրջաններ, ինչը կարող է ունենալ անվտանգային հետևանքներ։
Դեսպան Հակոբյանը հստակեցրել է, որ TRIPP երթուղին լիովին համահունչ է Հայաստանի «Խաղաղության խաչմերուկ» նախաձեռնությանը և ենթադրում է երկաթուղային կապի բացում Նախիջևանի միջոցով, ինչը Հայաստանին կմիացնի Իրանին և տարանցիկ հնարավորություններ կստեղծի դեպի Սև ծով ու Կենտրոնական Ասիա։
Խոսելով Թուրքիայի հետ հարաբերությունների կարգավորման մասին՝ Գրիգոր Հակոբյանը հայտնել է շփումների ակտիվացման և կառուցողական ներգրավվածության մասին։ Նա տեղեկացրել է, որ արդեն իրականացվում են Կարս-Գյումրի երկաթգծի վերականգնման և հայ-թուրքական էլեկտրահաղորդման գծերի տեխնիկական գնահատումներ։ Դեսպանը համոզմունք է հայտնել, որ TRIPP երթուղին և Վաշինգտոնյան սկզբունքները բարենպաստ միջավայր կստեղծեն Թուրքիայի հետ սահմանների բացման և տարածաշրջանային համագործակցության ամրապնդման համար։
Պատմություններ
