Հաջորդ տարի «Աջափնյակի» մետրոյի կայարանի կառուցման մրցույթ կհայտարարվի. Ավինյան

Երևանի քաղաքապետ Տիգրան Ավինյանը տարեվերջյան ամփոփիչ ասուլիսի ժամանակ հերքեց «Աջափնյակի» մետրոյի կայարանի կառուցման ծրագրի խափանման մասին լուրերը՝ հայտարարելով, որ նախագծի փորձաքննությունն արդեն ավարտված է։ 

«Հաջորդ տարի, ամենայն հավանականությամբ, «Աջափնյակի» մետրոյի կայարանի կառուցման մրցույթ կհայտարարվի»,- հայտնեց նա:

Քաղաքապետի փոխանցմամբ՝ նախագծային փուլի ձգձգումը պայմանավորված էր գործընթացի բարդությամբ և տեղական օրենսդրության մեջ նմանատիպ նախագծերի փորձի բացակայությամբ։ Հաջորդ տարի կառավարությունը նախատեսում է ընդունել հատուկ որոշում, որով կսահմանվի ծրագրի կառավարման «ՖԻԴԻԿ» (FIDIC) մոդելը՝ ներգրավելով փորձառու ինժեներական հսկողություն՝ շինարարության որակն ու ժամկետները վերահսկելու նպատակով։

«Մեր օրենսդրությունն այս տեսակ նախագծի հետ նախկինում առնչություն չի ունեցել, և հիմնականում ժամանակային հետաձգումները դրա հետ են կապված»,- ասաց Ավինյանը:

Ավինյանի համոզմամբ՝ ավելի լավ է մի փոքր ավելի ժամանակ ծախսել նախագծային փուլերի վրա գրագետ տեղհսկողություն ունենալու վրա, որ հետագայում շինարարության ընթացքում հնարավոր լինի կառավարումն ամբողջապես՝ որակային և ժամանակային:

***

Դեկտեմբերի 23-ին ավագանու նիստի ժամանակ քաղաքապետ Տիգրան Ավինյանը հայտնել էր, որ Երևանի Աջափնյակ թաղամասում մետրոպոլիտենի նոր կայարանի կառուցման համար նախատեսված բյուջետային հատկացումներն այս տարի ենթարկվել են կտրուկ վերանայման. նախնական 9,6 մլրդ դրամից աշխատանքների համար մնացել է 1,6 մլրդ դրամ։ Օգտագործված միջոցներն ուղղվել են 45 նոր տրոլեյբուսների գնմանը, որոնք Երևան կհասնեն 2026-ի առաջին ամիսներին։