Civilnet
2025-ը Հայաստանի խորհրդարանն ամփոփեց զինված ուժերի ձևավորումից հետո երբևէ չիրականացված նորամուծությամբ. ժամկետային պարտադիր զինվորական ծառայությունը կրճատվեց՝ երկու տարուց դառնալով մեկուկես տարի։ Այս փոփոխությունը գործելու է 2026 թվականից։
Զինվորական ծառայության ժամկետի կրճատում
Հունվարի 1-ից Հայաստանում ժամկետային զինծառայությունը կկրճատվում է, երկու տարվա փոխարեն կլինի մեկ ու կես տարի։ Պաշտպանության նախարար Սուրեն Պապիկյանի խոսքով՝ նոր կարգավորումը վերաբերելու է 2025 թվականի վերջին զորակոչվածներին։
«18-ամսյա ժամկետով ծառայություն են իրականացնելու 2025 թվականի ձմեռային զորակոչից սկսած պարտադիր զինվորական ծառայության զորակոչ կոչված քաղաքացիները»,- պարզաբանել է նախարարը։
Էլեկտրամոբիլների ներկրման արտոնություններ
Քաղաքացիները 2026 թվականին ևս կկարողանան ներկրել էլեկտրամոբիլներ՝ առանց ավելացված արժեքի հարկի (ԱԱՀ) վճարման։ Այս արտոնյալ կարգավորումը տարածվում է 2024, 2025 և 2026 թվականների արտադրության մեքենաների վրա՝ նպատակ ունենալով խթանել էկոլոգիապես մաքուր տրանսպորտի կիրառումը։
Սոցիալական նպաստների և կենսաթոշակների բարեփոխումներ
2026 թվականին ամբողջությամբ փոխվում են երեխայի ծննդյան միանվագ, ինչպես նաև երկրորդ ու հաջորդ երեխային տրվող աջակցության նպաստի չափերը։ Միանվագ նպաստը համահարթեցվում է. բոլոր երեխաների դեպքում այն կկազմի 500 հազար դրամ։ Բացի այդ, 2026-ի ապրիլի 1-ից կենսաթոշակների ու նպաստների վճարումը կդառնա բացառապես անկանխիկ։
Առողջապահական ապահովագրություն և վերականգնողական ծրագրեր
2026-ը շրջադարձային է առողջապահության համապարփակ ապահովագրության ներդրման տեսանկյունից, որն իրականացվում է փուլային տարբերակով։ Զուգահեռաբար, ուժի մեջ է մտնում ընտանեկան և կենցաղային բռնություն գործադրած անձանց ռեաբիլիտացման ծրագիրը։ Այս նախաձեռնությունը սահմանում է բռնարարների վերականգնման իրավական հիմքը, ինչը միջազգային պարտավորությունների կատարման և զոհերի պաշտպանության քայլ է։
Եկեղեցապատկան հողերի իրավական կարգավիճակի փոփոխություն
2026-ից վերանայվում են նաև եկեղեցուն հողամասերի տրամադրման հիմքերը։ Կառավարության որոշմամբ՝ այսուհետ հողամասերը եկեղեցուն կփոխանցվեն ոչ թե սեփականության, այլ անհատույց օգտագործման իրավունքով։ Այս փոփոխությունն իրականացվում է գործադիր իշխանության և եկեղեցու միջև առկա լարվածության ու Գարեգին Բ կաթողիկոսի հրաժարականի պահանջների ֆոնին։
2026-ը կլինի հետպատերազմյան այս խորհրդարանի գործունեության վերջին տարին, ինչն իր հերթին կարող է ազդել օրենսդրական օրակարգի դինամիկայի վրա։
Պատմություններ
