Վերաքննիչ դատարանը դատախազին ժամանակ տվեց Դավիթ Համբարձումյանի գործին ծանոթանալու համար

Վերաքննիչ քրեական դատարանում հունվարի 12-ին պետք է սկսվեր Մասիսի նախկին համայնքապետ Դավիթ Համբարձումյանի պաշտպանների ներկայացրած բողոքի քննությունը։ Փաստաբանները պահանջում են բեկանել առաջին ատյանի դատարանի վճիռը, ըստ որի՝ Համբարձումյանը դատապարտվել է 6 տարի 3 ամիս ազատազրկման։ Նիստը, սակայն, հետաձգվեց։

Նիստի մեկնարկին հանրային մեղադրող Հայկ Ավետյանը միջնորդեց հետաձգել քննությունը։ Նա նշեց, որ նոր է ներգրավվել վարույթում և դեռ չի հասցրել ծանոթանալ գործի նյութերին։

Պաշտպանները չառարկեցին հետաձգման դեմ, սակայն պահանջեցին նախքան նիստի ընդհատումը քննարկել Դավիթ Համբարձումյանի խափանման միջոցը փոխելու հարցը։ Դատարանը, սակայն, գտավ, որ մեղադրողը պետք է ծանոթանա գործի նյութերին, որից հետո միայն կքննարկվի Համբարձումյանի խափանման միջոցի հարցը։

Այսպիսով, հանրային մեղադրողին տրամադրվեց մեկ շաբաթ ժամանակ՝ նյութերին ծանոթանալու համար։ Հաջորդ դատական նիստը նշանակվեց հունվարի 19-ին։

***

2025-ին վեց տարվա դատական քաշքշուկից հետո հրապարակվեց Մասիսի քաղաքապետ Դավիթ Համբարձումյանի դատավճիռը։ Քաղաքապետը նաև ընդդիմադիր խմբակցությունների վարչապետի թեկնածուն էր։ Մեղադրանքը վերաբերում էր 2018-ի ապրիլի 22-ին Հայանիստ-Հովտաշատ խաչմերուկում ցուցարարների վրա հարձակմանը և Էրեբունի վարչական շրջանում զանգվածային անկարգություններին։ Վճռի հրապարակման պահին Համբարձումյանն արտերկրում էր, սակայն վերադառնալուն պես վերցվեց արգելանքի։