Civilnet
Եվրամիությունը պատրաստ է աջակցել Ադրբեջանին` Նախիջևանում երկաթուղային գծի վերականգնման գործում։ Այս մասին հունվարի 21-ին Դավոսում Ադրբեջանի նախագահ Իլհամ Ալիևի հետ հանդիպմանն ասել է Եվրոպական Միության ընդլայնման հարցերով հանձնակատար Մարթա Կոսը։
Հանդիպման ժամանակ նրանք մտքեր են փոխանակել Ադրբեջանի և Հայաստանի միջև հարաբերությունների կարգավորման և խաղաղության օրակարգի առաջխաղացման վերաբերյալ։ Ալիևն ու Կոսը նաև քննարկել են էներգետիկայի, տարածաշրջանային տրանսպորտային հաղորդակցությունների, մարդասիրական ականազերծման և այլ ոլորտներում համագործակցությունը։
Զրույցի ընթացքում ընդգծվել է Ադրբեջանի և Եվրամիության միջև բազմաթիվ ոլորտներում համագործակցության հետագա ընդլայնման մեծ հեռանկարների առկայությունը։
***
Հայաստանի և Ադրբեջանի միջև տրանսպորտային հաղորդակցությունների ապաշրջափակման գործընթացում առանցքային դեր ունի երկաթգծի վերականգնումը, մասնավորապես՝ Երասխ-Ջուլֆա-Օրդուբադ-Մեղրի-Հորադիզ երթուղին:
Հայաստանը դեռևս չի սկսել երկաթուղու վերականգնման գործընթացը, սպասում է ռուսական կողմի արձագանքին։ Հայաստանի երկաթուղային ցանցը գտնվում է ռուսական կոնցեսիայի ներքո։ Հայաստանի վարչապետ Նիկոլ Փաշինյանը հայտարարել է, որ Հայաստանը պատրաստ է սեփական միջոցներով վերականգնել երկաթուղային ենթակառուցվածքների կարևոր հատվածները, եթե ռուսական կողմը պատշաճ ժամկետներում չիրականացնի այդ աշխատանքները։ Խոսքը վերաբերում է Տավուշի հատվածում մինչև Իջևան երկաթուղային կայարանը ներառյալ, Ախուրիկի հատվածում Հայաստան-Թուրքիա սահմանից մինչև գործող երկաթուղային հատվածին, և Հայաստան-Նախիջևան սահմանից մինչև Երասխ հատվածին։
Պատմություններ
