Այս պահին ՀԷՑ-ի շուկայական արժեքի գնահատում է տեղի ունենում. Փաշինյան

Այս պահին «Հայաստանի էլեկտրական ցանցեր» ընկերության շուկայական արժեքի գնահատում է տեղի ունենում: Այս մասին կառավարությունում հունվարի 29-ի ճեպազրույցի ժամանակ հայտնեց վարչապետ Նիկոլ Փաշինյանը:

«Եթե այդ արժեքը լինի հասանելի պետբյուջեի համար, մենք այն ամբողջությամբ կազգայնացնենք և կհանձնենք հավատարմագրված կառավարման՝ բարձր պրոֆեսիոնալ ընկերության կամ ընկերությունների խմբի»,- ասաց Փաշինյանը:

Վարչապետն ավելի վաղ հայտնել էր, որ ՀԷՑ-ի ազգայնացման երկու սցենար է դիտարկվում. ՀԷՑ-ի ամբողջական ազգայնացում և դրա հանձնում պրոֆեսիոնալ և հուսալի կառավարման՝ ամբողջությամբ մնալով պետական սեփականություն։ Երկրորդ սցենարի համաձայն՝ ընկերության բաժնետերերի մեծ մասը կարող է փոխանցվել էներգետիկ ոլորտի միջազգային հեղինակավոր կառավարչի։

Վարչապետն այսօր հայտնեց, որ այս մասին փորձում են իրազեկել Էներգետիկ ոլորտում միջազգային թոփ ընկերություններին:   

«Հիմա կարծիքներ են հնչում, որ կարող է պարզվի, որ ՀԷՑ-ի ֆինանսական արժեքն այնքան ցածր է, որ կարելի է կառավարության որոշմամբ ինչ-որ գումար հատկացնել և դա դարձնել պետական:

Մենք շտապելու բան չունենք, ՀԷՑ-ն այս պահին դե ֆակտո պատկանում է Հայաստանին»,- ասաց Փաշինյանը:

Նոյեմբերի 17-ին Հանրային ծառայությունները կարգավորող հանձնաժողովը դադարեցրել է ՀԷՑ–ի՝ «Տաշիր կապիտալ» ընկերությանը տրված լիցենզիան։ Հայաստանի էլեկտրական ցանցեր (ՀԷՑ) ընկերության ժամանակավոր կառավարիչ Ռոմանոս Պետրոսյանը նոյեմբերին հայտնել էր, որ արևմտյան խոշոր էներգետիկ ընկերությունները հետաքրքրվածություն են ցուցաբերել Հայաստանի բաշխիչ ցանցերի կառավարման հարցում։ 

Նոյեմբերի կեսերին Պետրոսյանը նաև հայտնել էր, որ առաջիկա երեք ամիսներին ՀԷՑ-ը գործելու է ժամանակավոր կառավարչի գործադիր լիազորությունների ներքո, քանի դեռ նոր լիցենզիա տրամադրված չէ։ 

***

Հունիսի 17-ից Հայաստանի կառավարության և ՀԷՑ-ի սեփականատեր, գործարար Սամվել Կարապետյանի հարաբերությունները կտրուկ լարվել էին այն բանից հետո, երբ Կարապետյանը քննադատել էր Հայաստանի իշխանություններին Ամենայն Հայոց կաթողիկոսի և հոգևորականության դեմ սկսած արշավի համար։ Հունիսի 18-ին Երևանի ընդհանուր իրավասության քրեական դատարանը որոշել էր Սամվել Կարապետյանին կալանավորել։ Նույն օրը վարչապետ Նիկոլ Փաշինյանը հայտարարել էր Կարապետյանին պատկանող Հայաստանի էլեկտրական ցանցեր ընկերությունն ազգայնացնելու մասին։ Հուլիսի 3-ին ԱԺ-ն երկրորդ ընթերցմամբ և ամբողջությամբ ընդունել էր ՀԷՑ-ը պետականացնելու մասին նախագիծը։ՀԾԿՀ-ն հուլիսի 18-ին Կառավարության կողմից հուլիսի 15-ին ներկայացված հաղորդման հիմքով «Հայաստանի էլեկտրական ցանցեր» փակ բաժնետիրական ընկերության նկատմամբ հարուցել է վարչական վարույթ՝ ինչպես «Էներգետիկայի մասին» օրենքի, այնպես էլ հանձնաժողովի՝ օրենսդրության համաձայն ընդունված իրավական ակտով սահմանված պահանջների հնարավոր խախտման փաստերի ուսւոմնասիրության նպատակով։