Civilnet
Ադրբեջանը պատրաստակամություն է հայտնել ներդրում ունենալ Իրանի շուրջ ստեղծված լարվածության նվազեցման գործում և հարցերը լուծել բանակցությունների միջոցով, ինչի մասին հայտարարել է նախագահ Իլհամ Ալիևը Իրանի նախագահ Մասուդ Փեզեշքիանի հետ ունեցած հեռախոսազրույցի ընթացքում։ Այս մասին հայտնում են ադրբեջանական ԶԼՄ-ները:
Ադրբեջանի ղեկավարն իր մտահոգությունն է հայտնել տարածաշրջանում տիրող բարդ իրավիճակի կապակցությամբ, որը պայմանավորված է Իրանում շարունակվող ներքին անկայունությամբ և ԱՄՆ-ի ու Իսրայելի հետ հարաբերությունների սրմամբ՝ կապված միջուկային ծրագրի և ռազմական հնարավոր հարվածների սպառնալիքների հետ։
Զրույցի ընթացքում կողմերը վերահաստատել են, որ Ադրբեջանի և Իրանի հարաբերությունները հիմնված են բարեկամության, եղբայրության ու բարիդրացիության սկզբունքների, ինչպես նաև պատմական, էթնիկ և կրոնական կապերի վրա։
Պետությունների ղեկավարները գոհունակությամբ են հիշատակել նախկինում կայացած այցերն ու բանակցությունները, որոնք նպաստել են երկկողմ կապերի ընդլայնմանը, ինչպես նաև արձանագրել են, որ Արաքս գետի վրայով Աղբենդ և Քալալե բնակավայրերը միացնող ավտոմոբիլային կամրջի շինարարությունն ընթանում է ըստ սահմանված ժամանակացույցի։
Մասուդ Փեզեշքիանն իր շնորհակալությունն է հայտնել Իլհամ Ալիևին զանգի համար, որից հետո նախագահները մտքեր են փոխանակել համատեղ հետագա քայլերի շուրջ և պայմանավորվել շարունակել պաշտոնական շփումները։
***
ԱՄՆ նախագահ Դոնալդ Թրամփը զգուշացրել է Իրանին հնարավոր նոր ռազմական հարվածների մասին՝ հայտարարելով, որ դեպի երկրի ափեր է ուղևորվում հսկայական նավատորմ, որը պատրաստ է գործել «արագությամբ և բռնությամբ», եթե Թեհրանը չվերադառնա բանակցությունների սեղան։ Այս սպառնալիքները հաջորդել են Իրանում տեղի ունեցած ներքին բողոքի ակցիաներին, որոնք ճնշվել էին կոշտ ուժի կիրառմամբ։
Ի պատասխան Վաշինգտոնի հռետորաբանության՝ Իրանի արտգործնախարար Աբբաս Արաղչին հայտարարել է, որ իրենց զինված ուժերի «մատը ձգանին է»՝ հզոր հակահարված տալու ցանկացած ագրեսիայի։ Նա ընդգծել է, որ «12-օրյա պատերազմից» քաղված դասերը Թեհրանին հնարավորություն են տվել արձագանքել առավել ուժգին։ Այդուհանդերձ, իրանական կողմը պնդում է, որ դեռ պատրաստ է փոխշահավետ միջուկային գործարքի՝ վերահաստատելով, որ միջուկային զենքի ստեղծումն իրենց ծրագրերում ներառված չէ։
Կարդացեք նաև՝ Իրանի դեմ պատերազմ սկսելը սխալ կլինի, դիվանագիտական լուծումը հնարավոր է. Ֆիդան
Իրանը սպառնում է աննախադեպ պատասխան տալ ԱՄՆ-ի հնարավոր հարվածին
Պատմություններ
