Արայիկ Հարությունյանը Ստեփանակերտի Վերածննդի հրապարակում հանդես է գալու ուղերձով

Արցախի նախագահ Արայիկ Հարությունյանը հայտարարություն է տարածել՝ տեղեկացնելով, որ այսօր՝ հունիսի 22-ին, Ստեփանակերտի Վերածննդի հրապարակում հանդես է գալու ուղերձով՝ հաշվի առնելով Արցախում ձևավորված ներքաղաքական լարվածությունը։ Հարությունյանի հայտարարությունն ամբողջությամբ ներկայացնում ենք ստորև․

«Սիրելի՛ հայրենակիցներ, հաշվի առնելով այս օրերին Արցախում ձևավորված ներքաղաքական լարվածությունը և վերջին ամիսներին կուտակված հարցերը՝ այսօր Ստեփանակերտի Վերածննդի հրապարակում հանդես կգամ ուղերձով:

Բոլորին հրավիրում եմ ներկա գտնվել այսօրվա հանրահավաքին. ելույթս կսկսեմ ժամը 18:00-ին: Պատրաստվում եմ բաց ու անկեղծ խոսել բոլոր հիմնական խնդիրների ու լուծումների մասին՝ պատերազմից մինչև ներկա անվտանգային ու սոցիալ-տնտեսական իրավիճակ, ՀՀ իշխանությունների հետ հարաբերություններից մինչև ներքաղաքական զարգացումներ:

Ցավում եմ, որ այս հեղհեղուկ իրավիճակում ողջախոհությունը լքում է շատերին՝ առանց ընկալելու իրավիճակի լրջությունը Արցախի ապագայի համար: Անկախ իմ հանդեպ ոմանց վերաբերմունքից՝ ես այս ծանր իրավիճակում պատասխանատվություն եմ կրում Արցախի բոլոր քաղաքացիների համար»,- նշված է հայտարարությունում։

https://civilnet.am/news/623572/%d5%a1%d6%80%d6%81%d5%a1%d5%ad%e2%80%a4-%d5%b0%d5%a1%d6%81%d5%a1%d5%a4%d5%b8%d6%82%d5%ac-%d6%87-%d6%81%d5%b8%d6%82%d5%b5%d6%81%d5%9d-%d5%a1%d6%80%d5%a1%d5%b5%d5%ab%d5%af-%d5%b0%d5%a1%d6%80%d5%b8%d6%82%d5%a9%d5%b5%d5%b8%d6%82%d5%b6%d5%b5%d5%a1%d5%b6%d5%ab-%d5%b0%d6%80%d5%a1%d5%aa%d5%a1%d6%80%d5%a1%d5%af%d5%a1%d5%b6%d5%ab-%d5%ba%d5%a1%d5%b0%d5%a1%d5%b6%d5%bb%d5%b8%d5%be/