Արցախի խորհրդարանականները հանդիպել են խաղաղապահների ղեկավարության հետ

Այսօր ՝օգոստոսի 23-ին, Արցախ խորհրդարանական 5 ուժերի ղեկավարները հանդիպել են ՌԴ խաղաղապահ զորախմբի ղեկավարության հետ, հայտնում է Արցախի ԱԺ-ն։

«Հանդիպման շարժառիթը Հայաստանում ՌԴ դեսպանորդ-խորհրդական Մաքսիմ Սելեզնյովի՝ վերջերս արված հայտարարությունն էր, ինչպես նաև օգոստոսի սկզբին Ադրբեջանի կողմից հրադադարի հերթական խախտումն ու անվտանգային հարցերը։ Հանդիպման ընթացքում վերոնշյալ հարցերի շուրջ ՌԴ խաղաղապահ զորակազմի պատասխանատուների կողմից տրվել են պարզաբանումներ։ Մասնավորապես հղում կատարելով 2020-ի նոյեմբերի 9-ի եռակողմ հայտարարությանը՝ նշվել է, որ նոր երթուղին ունենալու է նույն միջանցքի կարգավիճակը, և պահպանվելու են բոլոր անվտանգային բաղադրիչները՝ սկսած 5 կմ-ոց անվտանգային գոտուց մինչև ՌԴ խաղաղապահ ուժերի անցակետերի տեղակայում»,- ասված է հաղորդագրությունում։

Խաղաղապահ զորախմբի ղեկավարությունը նշել է նաև, որ օգոստոսի սկզբին տեղի ունեցած դեպքերի հետ կապված կատարվել են անհրաժեշտ եզրահանգումներ։ Նրանք վստահեցրել են, որ լրացուցիչ ջանքեր կգործադրեն՝ ապագայում նման խախտումները կանխելու և բնակչության անվտանգությունն ապահովելու համար։

***

Oգոստոսի 3-ին ադրբեջանական ստորաբաժանումները Արցախի պաշտպանության բանակի դիրքերի ուղղությամբ կիրառել էին նռնականետեր և ԱԹՍ-ներ։ Ադրբեջանի սադրանքի հետևանքով զոհվել էր ՊԲ երկու զինծառայող, ևս 19 զինծառայող ստացել էր տարբեր աստիճանի վիրավորումներ։

Ադրբեջանական ստորաբաժանումները սադրանքի էին դիմել նաև օգոստոսի 1-ին՝ Արցախի հյուսիսային և հյուսիս-արևմտյան սահմանագոտու մի շարք հատվածներում։ Ադրբեջանական կողմը շփման գիծը հատելու փորձեր էր կատարել, որոնք կասեցվել էին ՊԲ ստորաբաժանումների ուժերով: