Civilnet
Թուրքիան փակել է իր օդային տարածքը հայկական ինքնաթիռների համար, NTV-ին տված հարցազրույցում հայտարարել է Թուրքիա արտաքին գործերի նախարար Մևլութ Չավուշօղլուն։
Նա նշել է, որ այդ քայլը պատասխան է Երևանում ապրիլի 25-ին տեղադրված «Նեմեսիս» գործողության հուշարձանի բացմանը․ «Ես չեմ կարող դա ընդունել։ Շարունակվելու դեպքում նոր քայլեր կձեռնարկենք»,- հավելել է Չավուշօղլուն։
Ըստ Թուրքիայի ԱԳՆ ղեկավարի՝ խոսքը երրորդ երկրներ թռիչքների մասին է։ Երևան-Ստամբուլ և հակառակ ուղղությամբ հայկական ավիանընկերությունները կարող են թռիչքներ կատարել։
Չավուշօղլուն նաև ասել է, որ Հայաստանի ԱԺ նախագահին թույլատրվել է մեկնել Անկարա՝ Սևծովյան տնտեսական համագործակցության խորհրդարանական վեհաժողովի նիստին մասնակցելու նպատակով, քանի որ դա միջազգային համաժողով է։
***
Հայկական լրատվամիջոցների հաղորդմամբ՝ թուրքական արգելքի հետևանքով չեղարկվել է Երևան-Փարիզ-Երևան չվերթը:
Ավելի վաղ Թուրքիայի արտգործնախարարության տարածած հայտարարությունում հուշարձանի բացումը «սադրիչ և ամոթալի» քայլ է համարվել:
«Նման սադրիչ քայլերը որևէ կերպ չեն նպաստի տարածաշրջանում կայունության, խաղաղության հաստատման ջանքերին, այլ ընդհակառակը՝ բացասաբար կազդեն կարգավորման գործընթացի վրա»,- նշված է հաղորդագրությունում:
Պատմություններ
