Անի Գրիգորյան, #CivilNetCheck
Վարչապետ Նիկոլ Փաշինյանի մայիսի 7-ի ասուլիսի ժամանակ հարց էր հնչել, թե որքան արցախցի է լքել Հայաստանը՝ 2023-ի սեպտեմբերից ի վեր։
«Մամուլն ապրիլի 6-ին գրել էր, որ շուրջ 16 000 արցախցի է բռնի տեղահանությունից ի վեր լքել ՀՀ-ն»,- ասել էր լրագրողը՝ խնդրելով վարչապետին պարզաբանել՝ արդյոք իսկապես այդքան մարդ լքել է Հայաստանը։
Փաշինյանը հերքեց այս թիվը. «…Ոչ, այդքան մարդ չի հեռացել Հայաստանից։ Դա իրականությանը չի համապատասխանում»։ Այնուհետև վարչապետը հավելեց, որ ինչպես ՀՀ քաղաքացիների դեպքում, արցախցիներն էլ գնում- գալիս են։
Ինչ է հայտնում ԱԱԾ-ն
Ազգային անվտանգության ծառայության տրամադրած տվյալների համաձայն՝ մայիսի 1-ի դրությամբ օդային և ցամաքային ուղիներով Հայաստանից մեկնել է բռնի տեղահանված 16 585 անձ, վերադարձել` 6 660-ը։ Այսինքն՝ մայիսի 1-ի դրությամբ չի վերադարձել 9 925-ը։
Ի դեպ, մեր նախորդ հարցմանն ի պատասխան, ԱԱԾ-ն տրամադրել էր տվյալներ, ըստ որոնց՝ սեպտեմբերից ապրիլի 1-ի դրությամբ ՀՀ-ից դուրս էր եկել 15 162, վերադարձել՝ 6062։ Այսինքն՝ չէր վերադարձել 9 100-ը։
Փաստացի միայն վերջին մեկ ամսում՝ ապրիլի ընթացքում, Հայաստանից դուրս է եկել 1 423 արցախցի։ Նրանց մեծ մասը՝ 825-ը, չեն վերադարձել։
