Մեկնարկել են «Արծիվ գործընկեր-2024» հայ-ամերիկյան զորավարժությունները

Հուլիսի 15-ին պաշտպանության նախարարության Վազգեն Սարգսյանի անվան ռազմական ակադեմիայում ազդարարվել է «Արծիվ գործընկեր-2024» հայ-ամերիկյան համատեղ զորավարժության մեկնարկը։

Հայաստանի պաշտպանական գերատեսչությունից հայտնում են, որ զորավարժության բացման արարողությանը ներկա են եղել պաշտպանության նախարար Սուրեն Պապիկյանը և ՀՀ-ում ԱՄՆ դեսպան Քրիստինա Քվինը։

«Բարձր եմ գնահատում զորավարժության նախապատրաստական գործընթացին մասնակցած Եվրոպայում և Աֆրիկայում ԱՄՆ ցամաքային զորքերի, Կանզասի ազգային գվարդիայի, որը 2 տասնամյակից ավել հանդիսանում է Հայաստանի գործընկերը, ՀՀ ԶՈւ խաղաղապահ բրիգադի զինծառայողների, ԱՄՆ դեսպանության ներկայացուցիչների և ՀՀ պաշտպանության նախարարության անձնակազմի աշխատանքը զորավարժության արդյունավետ պլանավորման գործում: Բարձր եմ գնահատում միջազգային խաղաղապահ առաքելությունների մասնակցող ստորաբաժանման փոխգործակցելիության մակարդակը խաղաղապահ գործողությունների շրջանակում բարձրացնելուն ուղղված այս համագործակցությունը»,- նշել է Պապիկյանը։

Միջազգային խաղաղապահ առաքելություններում մասնակցության նախապատրաստման շրջանակում հուլիսի 15-24-ը Հայաստանում կանցկացվի «Արծիվ գործընկեր-2024» հայ-ամերիկյան համատեղ զորավարժությունը։ Զորավարժությանը ներգրավված են Հայաստանի զինված ուժերի խաղաղապահ բրիգադի, Եվրոպայում և Աֆրիկայում ԱՄՆ ցամաքային զորքերի և Կանզասի ազգային գվարդիայի զինծառայողները:

Զորավարժության նպատակն է բարձրացնել միջազգային խաղաղապահ առաքելությունների մասնակցող ստորաբաժանման փոխգործակցելիության մակարդակը խաղաղապահ գործողությունների շրջանակում, իրականացնել կառավարման և մարտավարական հաղորդակցման լավագույն փորձի փոխանակում, ինչպես նաև բարձրացնել հայկական ստորաբաժանման պատրաստվածությունը:

https://civilnet.am/news/785419/%d5%b0%d5%a1%d5%b5-%d5%a1%d5%b4%d5%a5%d6%80%d5%ab%d5%af%d5%b5%d5%a1%d5%b6-%d5%a6%d5%b8%d6%80%d5%a1%d5%be%d5%a1%d6%80%d5%aa%d5%b8%d6%82%d5%a9%d5%b5%d5%b8%d6%82%d5%b6%d5%b6%d5%a5%d6%80%d5%a8-%d5%b4%d5%b8%d5%bd%d5%af%d5%be%d5%a1%d5%b5%d5%b8%d6%82%d5%b4-%d5%a1%d6%83%d5%bd%d5%b8%d5%bd%d5%a1%d5%b6%d6%84-%d5%a5%d5%b6-%d5%a1%d5%bc%d5%a1%d5%bb%d5%a1%d6%81%d5%b6%d5%b8%d6%82%d5%b4%e2%80%a4-%d5%a6%d5%a1%d5%ad%d5%a1%d6%80%d5%b8%d5%be%d5%a1/