Զանգեզուրի պղնձամոլիբդենային կոմբինատի 8 աշխատակցի հեռացրել են աշխատանքից
Civilnet
Զանգեզուրի պղնձամոլիբդենային կոմբինատի 8 աշխատակցի հեռացրել են աշխատանքից։ Այս մասին հայտնում են ԶՊՄԿ-ի մամուլի ծառայությունից։ Հաղորդագրության մեջ ասվում է, որ ընկերությունը սկսել է անօրինական գործողությունների և արտադրության սաբոտաժը հրահրող և կազմակերպող մասնակիցների աշխատանքային պայմանագրերի լուծման գործընթաց՝ խստորեն պահպանելով ՀՀ աշխատանքային օրենսդրության պահանջները։
Ընկերությունը հրապարակել է աշխատանքից ազատվածների անունները՝
Մարգարյան Շավարշ Հովհաննեսի
Արշակյան Կարեն Մարութի
Մխիթարյան Վահե Սամվելի
Բաբաջանյան Գոռ Վրեժի
Բաբաջանյան Վահե Վրեժի,
Բաբաջանյան Արթուր Վրեժի
Անդրեասյան Կարեն Արկադիի
Աթայան Տիգրան Արշամի
«Վերոնշյալ անձինք այլևս չեն հանդիսանում ընկերության աշխատակիցներ և այս պահից սկսած նրանք չունեն ընկերության հետ որևէ աշխատանքային հարաբերություն, իսկ նրանց հայտարարությունները կրում են մասնավոր բնույթ», - ասված է հայտարարության մեջ։
Աշխատանքից բացակայող մյուս աշխատակիցներին ընկերությունը հորդորում է օգտագործել այս հնարավորությունը՝ այսօր իրենց հերթափոխին ներկայանալ աշխատավայր և կատարել իրենց աշխատանքային պարտականությունները:
«ԶՊՄԿ-ում աշխատանքը պահպանելու Ձեր երաշխիքը կախված է Ձեր կողմից աշխատանքը անհապաղ վերսկսելուց: Բոլոր աշխատակիցների, նրանց ընտանիքների և Ընկերության շահերից է բխում արտադրական գործընթացի շուտափույթ վերսկսումը։ Դրանից է կախված աշխատակիցներին աշխատավարձ և նպաստներ վճարելու հնարավորությունը», - հայտնել են ընկերությունից։
Ութ օր է՝ շարունակվում է Հայաստանի ամենախոշոր ձեռնարկության՝ Զանգեզուրի պնղձամոլիբդենային կոմբինատի աշխատակիցների գործադուլը. պահանջը աշխատավարձերի բարձրացումն է։ Ընկերությունն անիրատեսական է համարում 50 տոկոսի չափով աշխատավարձերի բարձրացումը։
Պատմություններ
