Civilnet
Եվրոպական միությունը հաստատել է Խաղաղության եվրոպական հիմնադրամից Հայաստանի զինված ուժերին 20 մլն եվրոյի աջակցության տրամադրման որոշումը՝ հաղթահարելով ամիսներ տևած դիվանագիտական փակուղին և Հունգարիայի վետոն։ Այս մասին տեղեկանում են ԵՄ խորհրդի պաշտոնական էջից:
Խաղաղության եվրոպական հիմնադրամի (EPF) այս հատկացումը նպատակաուղղված է Հայաստանի զինված ուժերի լոգիստիկ հզորացմանը և տարածաշրջանային դիմակայունության բարձրացմանը։
Այս միջոցառմամբ ԵՄ-ն ընդլայնում է Հայաստանի զինված ուժերին ցուցաբերվող տեխնիկական օգնությունը՝ ընդհանուր աջակցության ծավալը հասցնելով 30 մլն եվրոյի։
«Եվրոպական խաղաղության հիմնադրամի այս օգնության միջոցառումը ևս մեկ քայլ է դեպի ԵՄ-ի և Հայաստանի միջև անվտանգության և պաշտպանության ոլորտում ավելի սերտ համագործակցություն: Այս միջոցառմամբ ԵՄ-ն ցույց է տալիս իր հանձնառությունը՝ շարունակելու աջակցել Հայաստանի դիմադրողականությանը, որը նպաստում է ամբողջ տարածաշրջանի կայունությանը, խաղաղությանը և անվտանգությանը»,- ասել է ԵՄ արտաքին գործերի և անվտանգության հարցերով բարձր ներկայացուցիչ, Եվրահանձնաժողովի փոխնախագահ Կայա Կալասը:
Աջակցության նպատակն է հզորացնել Հայաստանի զինված ուժերի լոգիստիկ կարողությունները՝ առաջնահերթությունը տալով ճգնաժամային իրավիճակներում քաղաքացիական անձանց պաշտպանությանը։ Ծրագիրը նախատեսում է բարձրացնել երկրի դիմակայունությունը և արագացնել հայկական ստորաբաժանումների փոխգործակցությունը միջազգային, այդ թվում՝ ԵՄ խաղաղապահ առաքելություններին հնարավոր մասնակցության համար։ Նոր հատկացումը լրացնելու է 2024-ին հատկացված 10 մլն եվրոյի ծրագիրը, որով նախատեսված ծավալվող վրանային ճամբարը կընդլայնվի մինչև բրիգադի չափի։
Որոշումն ընդունվել է Հայաստանի և ԵՄ անդամ պետությունների միջև տևական բանակցություններից հետո։ Դեռևս 2024-ի մարտին ԵՄ բարձր ներկայացուցիչ Կայա Կալասի կողմից առաջարկված այս նախաձեռնությունն ամիսներ շարունակ արգելափակված էր Հունգարիայի վետոյի պատճառով։
Հայաստանի արտաքին գործերի նախարարությունը 2025-ի դեկտեմբերի կեսերին հայտնել էր, որ ԵՄ բոլոր 27 անդամների միջև ձևավորվել է քաղաքական կոնսենսուս, որին նախորդել էր դեկտեմբերի 4-ին ՀՀ արտգործնախարար Արարատ Միրզոյանի և Հունգարիայի արտգործնախարար Պետեր Սիյարտոյի հանդիպումը Մալթայում։ Հայկական կողմի փոխանցմամբ՝ կողմերը պատրաստակամություն էին հայտնել ԵՄ գործիքակազմի միջոցով կոնկրետ ծրագրեր կյանքի կոչելու հարցում։
Պատմություններ
