Ֆրանսիան Հայաստանին կվաճառի երեք ռադար և ՀՕՊ համակարգեր

Ֆրանսիան Հայաստանին կվաճառի GM 200 ռադիոլոկացիոն երեք կայան, նաև ստորագրվել է Mistral զենիթահրթիռային համալիրների մատակարարման համաձայնագիր։ Այդ մասին հայտարարել է Ֆրանսիայի պաշտպանության նախարար Սեբաստիեն Լըկորնյուին, փոխանցում է Reuters-ը։

Նա նշել է, որ այդկերպ Ֆրանսիան Հայաստանին օգնում է բարելավել իր հակաօդային պաշտպանության կարողությունները․ «Երկնքի պաշտպանությունն առանցքային է»,- ՀՀ պաշտպանության նախարար Սուրեն Պապիկյանի հետ համատեղ ասուլիսի ժամանակ ասել է Լըկորնյուն։

Ֆրանսիայի պաշտպանության նախարարը հայտարարել է, որ Ֆրանսիան նաև կօգնի Հայաստանին վերապատրաստել իր ցամաքային ուժերը և կաջակցի Հայաստանի զինված ուժերի բարեփոխմանն ու արդիականացմանն ուղղված ջանքերին։ Մասնավորապես, կպատրաստվեն օպերատիվ ուսուցման ջոկատներ, հատկապես՝ լեռնային մարտի և բարձր ճշգրտության հրաձգության ուղղություններով։

Ֆրանսիական կողմն առաջիկայում կուսումնասիրի նաև Հայաստանի հակաօդային պաշտպանության համակարգերը՝ խնդիրները վերհանելու նպատակով։

«Երկու նախարարները ստորագրել են Thales-ի արտադրության երեք GM 200 ռադարների, որոնք Ֆրանսիան տրամադրել է նաև Ուկրաինային, վաճառքի պայմանագիր։ Ստորագրվել է նաև փոխըմբռնման հուշագիր ապագայում ֆրանսիական Mistral փոքր հեռահարության հակաօդային պաշտպանության համակարգի մատակարարման վերաբերյալ»,- գրում է կայքը։

https://civilnet.am/news/754922/%d5%b0%d5%a1%d5%b5%d5%a1%d5%bd%d5%bf%d5%a1%d5%b6%d5%b6-%d5%b8%d6%82-%d6%86%d6%80%d5%a1%d5%b6%d5%bd%d5%ab%d5%a1%d5%b6-%d5%bd%d5%bf%d5%b8%d6%80%d5%a1%d5%a3%d6%80%d5%a5%d5%ac-%d5%a5%d5%b6-%d5%ba%d5%a1%d5%b7%d5%bf%d5%ba%d5%a1%d5%b6%d5%b8%d6%82%d5%a9%d5%b5%d5%a1%d5%b6-%d5%b8%d5%ac%d5%b8%d6%80%d5%bf%d5%b8%d6%82%d5%b4-%d5%b0%d5%a1%d5%b4%d5%a1%d5%a3%d5%b8%d6%80%d5%ae%d5%a1%d5%af%d6%81%d5%b8%d6%82%d5%a9%d5%b5%d5%a1%d5%b6-%d5%b4%d5%a1%d5%bd%d5%ab%d5%b6-%d6%83%d5%a1%d5%bd%d5%bf%d5%a1%d5%a9%d5%b2%d5%a9%d5%a5%d6%80/